காவிரியில் இருந்து தமிழகத்துக்கு தண்ணீர் திறந்துவிட இயலாது: கர்நாடக தலைமைச் செயலர் கடிதம்

காவிரி நதியில் இருந்து தமிழகத்துக்கு தண்ணீர் திறந்துவிட இயலாது என, தமிழக அரசின் தலைமைச் செயலருக்கு கர்நாடக அரசின் தலைமைச் செயலர் கெüஷிக் முகர்ஜி கடிதம் எழுதியுள்ளார்.
 காவிரி நதியில் இருந்து தமிழகத்துக்குத் தர வேண்டிய தண்ணீரை திறந்துவிட கர்நாடக அரசுக்கு அறிவுறுத்தும்படி தமிழக முதல்வர் ஜெயலலிதா, பிரதமர் நரேந்திர மோடிக்கு அண்மையில் கடிதம் எழுதியிருந்தார்.
 இதன் நகலை கர்நாடக அரசுக்கும் அவர் அனுப்பினார். இந்த நிலையில், காவிரி நதியில் இருந்து தமிழகத்துக்கு தண்ணீர் திறந்துவிட இயலாது என தமிழக அரசின் தலைமைச் செயலருக்கு கர்நாடக அரசின் தலைமைச் செயலர் கெüஷிக் முகர்ஜி கடிதம் எழுதியுள்ளார். அந்தக் கடிதத்தில் அவர் மேலும் கூறியிருப்பதாவது:
 காவிரி நடுவர் மன்ற இறுதித் தீர்ப்பின்படி, தமிழக அரசுக்கு காவிரியில் இருந்து கர்நாடக அரசு 192 டிஎம்சி தண்ணீர் திறந்துவிட வேண்டும். கடந்த 40 ஆண்டுகளில் இல்லாத அளவுக்கு கர்நாடகத்தில் தற்போது கடுமையான வறட்சி ஏற்பட்டுள்ளது. மேலும், தென்மேற்குப் பருவமழை கர்நாடகத்தில் பொய்த்துவிட்டது. காவிரி நீர்பிடிப்புப் பகுதிகளிலும் மழை பெய்யவில்லை. இதனால், காவிரியின் குறுக்கே கட்டப்பட்டுள்ள அணைகளில் போதுமான தண்ணீர் இருப்பு இல்லை. இந்த அணைகளில் இருப்பு உள்ள தண்ணீரை கர்நாடக மக்களின் குடிநீருக்காகப் பயன்படுத்த வேண்டியுள்ளது. எனவே, காவிரி நடுவர் மன்ற உத்தரவின்படி, காவிரி நதியில் இருந்து தமிழகத்துக்கு தண்ணீர் திறந்துவிட இயலாத சூழ்நிலையில் கர்நாடகம் உள்ளது.
 கடந்த மழை ஆண்டில் காவிரியில் இருந்து நிர்ணயிக்கப்பட்ட அளவைக் காட்டிலும் கூடுதல் தண்ணீர் வழங்கப்பட்டுள்ளது. நிகழ் மழை ஆண்டில், ஜூன் 1-ஆம் தேதி முதல் செப்.4-ஆம் தேதி வரை 68 டிஎம்சி தண்ணீர் வழங்கப்பட்டுள்ளது. எனவே, கர்நாடகத்தின் சூழ்நிலையை தமிழக அரசு புரிந்துகொண்டு ஒத்துழைப்பு வழங்கும் என்று எதிர்பார்க்கிறேன் என்று அக்கடிதத்தில் கெüஷிக் முகர்ஜி குறிப்பிட்டுள்ளார்.