தில்லியில் டெங்குவுக்கு மேலும் இருவர் பலி: கடந்த ஒரு வாரத்தில் 600 பேர் பாதிப்பு

தில்லியில் டெங்கு காய்ச்சலுக்கு மேலும் இருவர் பலியாகி உள்ளனர். கடந்த ஒரு வாரத்தில் மட்டும் 613 பேர் டெங்குவால் பாதிக்கப்பட்டுள்ளனர்.

இதுதொடர்பாக தெற்கு தில்லி மாநகராட்சியின் உயரதிகாரி ஒருவர் கூறியதாவது:  தில்லியில் நிகழாண்டு ஜனவரி முதல் கடந்த 12ஆம் தேதி வரை மொத்தம் 1872 பேருக்கு டெங்கு காய்ச்சல் ஏற்பட்டுள்ளது. கடந்த 5 ஆண்டுகளை ஒப்பிடும்போது, இந்த எண்ணிக்கை மிக அதிகமாகும். கடந்த ஒரு வாரத்தில் மட்டும் 613 பேர் பாதிக்கப்பட்டுள்ளனர்.

 டெங்குவால் பாதிக்கப்பட்டு, ஹிந்து ராவ் மருத்துவமனையில் அனுமதிக்கப்பட்ட 6 மாத குழந்தை அனிஷ்கா கடந்த 12ஆம் தேதி உயிரிழந்தது. அதேபோல, ஃபோர்டிஸ் மருத்துவமனையில் அனுமதிக்கப்பட்ட சுர்ஜீத் சிங் (52) என்பவரும் உயிரிழந்துள்ளார்.

 இதைத் தொடர்ந்து, தில்லியில் டெங்குவால் உயிரிழந்தோரின் எண்ணிக்கை 5ஆக அதிகரித்துள்ளது. இதனிடையே, தில்லியில் டெங்கு நோய் சிகிச்கைக்கு வரும் நோயாளிகளுக்காக படுக்கை வசதிகளை அரசு, தனியார் மருத்துவமனைகளில் அதிகரிக்க நடவடிக்கை எடுக்கும்படி மத்திய சுகாதாரத் துறை அமைச்சர் ஜே.பி. நட்டா உத்தரவிட்டுள்ளார்.