என்ஆர்சி விவகாரத்தில் குடியரசுத் தலைவர் தலையிட வேண்டும்: எதிர்க்கட்சிகள் வலியுறுத்தல்

அஸ்ஸாம் தேசிய குடிமக்கள் பதிவேடு (என்ஆர்சி) விவகாரத்தில் குடியரசுத் தலைவர் ராம்நாத் கோவிந்த் தலையிட்டு பிரச்னையைத் தீர்க்க வேண்டும் என்று காங்கிரஸ், திரிணமூல் காங்கிரஸ் உள்ளிட்ட எதிர்க்கட்சிகள் வலியுறுத்தியுள்ளன.
குடியரசுத் தலைவர் ராம்நாத் கோவிந்தை சந்தித்து என்ஆர்சி விவகாரம் தொடர்பாக மனு ஒன்றை எதிர்க்கட்சிகள் அளித்தன.
என்ஆர்சி இறுதி வரைவு பட்டியலில் 40 லட்சம் பேரின் பெயர்கள் விடுபட்டன. அவர்களில் பெரும்பாலானவர்கள் உத்தரப் பிரதேசம், ராஜஸ்தான், மேற்கு வங்கம், பஞ்சாப் உள்ளிட்ட மாநிலங்களைச் சேர்ந்தவர்கள். அஸ்ஸாமில் அவர்கள் மிக நீண்ட காலமாக வசித்து வருகின்றனர்.
என்ஆர்சி விவாகரத்தில் உச்ச நீதிமன்றம் பிறப்பித்த உத்தரவை திசைதிருப்பும் வகையில் மத்திய அரசு அறிக்கைகளை வெளியிட்டு வருகிறது. என்ஆர்சியை வெளியிட்டதன் மூலமாக அரசமைப்புச் சட்டம், நீதித் துறை, நாடாளுமன்றம், ஊடகம் ஆகியவற்றை அழிக்கும் முயற்சியில் மத்திய அரசு இறங்கிவிட்டது தெரிகிறது.
நாட்டின் உயர்ந்த அமைப்புகளை பாதுகாக்க வேண்டுமானால், என்ஆர்சியில் ஒரு இந்தியரின் பெயர் கூட விடுபடக்கூடாது என்பதை உறுதிப்படுத்த வேண்டும் என்று அந்த மனுவில் தெரிவிக்கப்பட்டுள்ளது.