சுரேஷ் கோபிக்கு மத்திய அமைச்சர் பதவி..?

மத்தியில் அமையவுள்ள புதிய அமைச்சரவையில் யார், யாருக்கு வாய்ப்பு கிடைக்கும் என்கிற எதிர்பார்ப்பு எழுந்துள்ள நிலையில், கேரளத்தின் திருச்சூர் மக்களவை தொகுதியில் பாஜக வேட்பாளராகப் போட்டியிட்டு வெற்றி பெற்ற மலையாள நடிகர் சுரேஹ் கோபிக்கு மத்திய அமைச்சரவையில் பதவி வழங்கப்பட உள்ளதாக பாஜக வட்டாரங்கள் தெரிவிக்கின்றன.

மூன்றாவது முறையாக பிரதமர் நரேந்திர மோடி தலைமையிலான பாஜக கூட்டணி அரசு ஞாயிற்றுக்கிழமை(ஜூன் 9) மாலை 7 மணியளவில் பதவி ஏற்கவுள்ளது. பாஜக கூட்டணியில் யார், யாருக்கு அமைச்சர் பதவி, என்னென்ன இலாகா என்பது தொடர்பாக முதல்கட்ட ஆலோசனைக் கூட்டம் தில்லியில் உள்ள ஜெ.பி.நட்டாவின் இல்லத்தில் சனிக்கிழமை காலை நடைபெற்றது.

முன்னதாக, தனது தேர்தல் பிரசாரங்களில் ‘’திருச்சூருக்கான ஒரு மத்திய அமைச்சர், இது மோடியின் உத்தரவாதம்” என்ற முழக்கத்தின் மூலம், தன்னை வெற்றி பெறச் செய்தால் திருச்சூர் தொகுதியிலிருந்து ஒரு மத்திய அமைச்சராக தான் பதவியேற்பேன் என்று குறிப்பிட்டிருந்தார் சுரேஷ் கோபி.

தமிழ்நாடு, புதுச்சேரி, கேரளம் ஆகிய 3 மாநிலங்களையும் சேர்த்து மொத்தமுள்ள 60 மக்களவை தொகுதிகளில் பாஜக தலைமையிலான தேசிய ஜனநாயகக் கூட்டணி ஒரேயொரு இடத்தில் மட்டுமே வெற்றி பெற்றுள்ளது குறிப்பிடத்தக்கது.

இதையடுத்து மத்திய அமைச்சரவையில் தென் இந்தியாவின் பாஜக பிரதிநிதியாக சுரேஷ் கோபி இடம்பெற அதிக வாய்ப்பிருப்பதாகவே பாஜக வட்டாரங்கள் தெரிவிக்கின்றன.

இந்த நிலையில், புதுதில்லியில் இன்று(ஜூன் 9) பிரதமர் பதவியேற்பு நிகழ்ச்சியில் பங்கேற்பதற்காக புறப்பட்டுச் சென்ற சுரேஷ் கோபி, திருவனந்தபுரத்தில் செய்தியாளர்களுடன் பேசியதாவது, ”அமைச்சர் பதவியைப் பொருத்தவரை, மோடியே முடிவை எடுப்பார். இதைப் பற்றி வேறு எதுவும் எனக்கு தெரியாது. பிரசாரத்தின் போது, திருச்சூர் மக்களிடம் ஏற்கெனவே சொல்லிவிட்டேன். கேரளத்துக்கும் தமிழகத்துக்கும் சேர்த்து பணியாற்றும் ஒரு எம்.பி.யாக நான் இருப்பேன்” என்று கூறிச் சென்றார்.