தோ்வுகளில் முறைகேடுகளைத் தடுக்க முக அங்கீகார தொழில்நுட்பம் மற்றும் செயற்கை நுண்ணறிவு (ஏஐ) தொழில்நுட்பத்துடன் கூடிய கண்காணிப்பு கேமராக்களை தோ்வறைகளில் பொருத்த மத்திய பணியாளா் தோ்வாணையம் (யுபிஎஸ்சி) முடிவு செய்துள்ளது.

மத்திய அரசால் நடத்தப்படும் ‘நீட்’, ‘நெட்’ போன்ற தோ்வுகளில் முறைகேடு சம்பவங்கள் நடைபெற்றதையடுத்து யுபிஎஸ்சி இந்த முடிவை எடுத்துள்ளது.

ஐஏஎஸ், ஐபிஎஸ் உள்ளிட்ட குடிமைப் பணிகளுக்கான தோ்வுகள் உள்பட 14 முக்கியத் தோ்வுகளை யுபிஎஸ்சி நடத்தி வருகிறது. இத்துடன், மத்திய அரசின் குரூப் ‘ஏ’, குரூபி ‘பி’ ஆகிய பணிகளுக்கான நியமனத் தோ்வுகள் மற்றும் நோ்முகத் தோ்வையும் நடத்தி வருகிறது.

காா்கில், ஸ்ரீநகா், காங்டாக், அகா்தலா உள்பட 80-க்கும் மேற்பட்ட நகரங்களில் நடத்தப்படும் இத்தோ்வுகளில் சராசரியாக 26 லட்சம் போ் பங்கேற்கின்றனா். இந் நிலையில், தோ்வுகளில் வெளிப்படைத்தன்மையை உறுதிப்படுத்தவும் முறைகேடுகளை தடுக்கவும் சில முன்னெடுப்புகளை மேற்கொள்ள யுபிஎஸ்சி முடிவு செய்துள்ளது.

புதிய சீா்திருத்தங்கள்: தோ்வா்களின் ஆதாா் எண்ணை அடிப்படையாக்கொண்ட விரல்ரேகைப் பதிவு, முக அங்கீகாரம் தொழில்நுட்பம், நுழைவுச் சீட்டில் உள்ள ‘க்யூா்ஆா்’ குறியீடு சரிபாா்ப்பு, ஏஐ தொழில்நுட்பத்துடன் கூடிய சிசிடிவி கேமராக்கள் மூலம் நேரடி கண்காணிப்பு போன்ற தொழில்நுட்பங்களை தோ்வுகளில் யுபிஎஸ்சி பயன்படுத்தவுள்ளது. இந்த தொழில்நுட்பங்களை வடிவமைப்பதற்கு அனுபவமிக்க பொதுத்துறை நிறுவனங்களுக்கு ஏலத்தில் பங்கேற்க ஆணையம் அண்மையில் அழைப்பு விடுத்தது.

தோ்வா்கள் தங்கள் விண்ணப்பத்தில் பதிவேற்றம் செய்த புகைப்படங்களுடன் தோ்வு நடைபெறும் நாளில் புதிதாக முக அங்கீகார தொழில்நுட்பத்தால் எடுக்கப்படும் புகைப்படங்கள் ஒப்பீடு செய்யப்படவுள்ளது. ஒரு தோ்வறைக்கு 24 தோ்வா்கள் அமரும் வகையில் வசதிகள் செய்யப்படவுள்ளன.

தோ்வு மையம், தோ்வு அறையின் நுழைவாயில் மற்றும் பிற வாயில்கள், கட்டுப்பாட்டு அறைகளில் வண்ண சிசிடிவி கேமராக்கள் பொருத்தப்பட்டு தோ்வா்களின் நடவடிக்கைகள் கண்காணிக்கப்படவுள்ளன.

தோ்வு அறைகளில் தோ்வா்கள் அமரும் நாற்காலிகள் அல்லது பிற இருக்கைகள் சரியாக வரிசைப்படுத்தப்படாமல் இருந்தாலோ அல்லது தோ்வு தொடங்கும் முன்பும் முடியும் முன்பும் சந்தேகப்படும்படியான நடமாட்டங்கள் இருந்தால் ஏஐ கேமராக்கள் உடனடியாக எச்சரிக்கை ஒலி எழுப்பும் வகையில் வடிவமைக்குமாறு யுபிஎஸ்சி அறிவுறுத்தியுள்ளது.

மேலும், ஆணையத்தால் குறிப்பிடப்பட்டுள்ள தோ்வு சீா்திருத்த தொழில்நுட்ப நடைமுறைகளை செயல்படுத்த விரும்பும் நிறுவனங்களிடம் ஏல விண்ணப்பங்கள் ஜூலை 7-ஆம் தேதி பிற்பகல் 1 மணிவரை பெறப்படுகின்றன. அதே தினத்தில் ஏலமும் நடைபெறும் எனவும் யுபிஎஸ்சி தெரிவித்துள்ளது.