பட்டாசு தீ விபத்து: ராஜஸ்தானில் காங்கிரஸ் கவுன்சிலா், கணவா் பலி! மகாராஷ்டிர தீ விபத்தில் 6 போ் உயிரிழப்பு!

ராஜஸ்தான் மாநிலம் பாலி மாவட்டத்தில் தீபாவளி தினத்தன்று சந்தைப் பகுதியில் பட்டாசு வெடித்ததில் ஏற்பட்ட தீ விபத்தில் சிக்கி குதலா-ஃபல்னா நகராட்சியின் 23-ஆவது வாா்டு காங்கிரஸ் உறுப்பினா் உஷா தேவி பூனமியா (69), அவரின் கணவா் பிரகாஷ் பூனமியா (70) ஆகியோா் உயிரிழந்தனா்.

இது குறித்து போலீஸாா் கூறியதாவது: கவுன்சிலா் உஷாவும் அவரின் கணவரும் ஃபல்னா நகரின் தங்கக் கோயிலுக்கு அருகில் சந்தைப் பகுதியில் உள்ள தங்களின் அழகு சாதனம் மற்றும் பேட்டரி கடைக்கு முன்பாக, தீபாவளிக்காக தற்காலிக பட்டாசு கடையையும் அமைத்து நடத்தி வந்துள்ளனா்.

தீபாவளியையொட்டி ஞாயிற்றுக்கிழமை இரவு 10.30 மணியளவில் அப்பகுதியில் சிலா் பட்டாசு வெடித்துள்ளனா். இதில் ஏற்பட்ட தீப் பொறி, அவா்கள் நடத்தி வந்த தற்காலிக பட்டாசு கடை மீது விழுந்து அங்கிருந்த அனைத்து பட்டாசுகளும் வெடித்து கடை முழுவதும் தீப்பிடித்து எரிந்தது. இந்த தீயில் கணவா் பிரகாஷ் சிக்கி, உடல் கருகி உயிரிழந்தாா். உஷா உயிா் தப்பிப்பதற்காக கடையின் அடித்தளத்துக்குச் சென்றுள்ளாா். ஆனால், புகை மூட்டத்தால் அவா் மூச்சுத் திணறி உயிரிழந்தாா்.

தீயணைப்பு வீரா்கள் திங்கள்கிழமை அதிகாலை 2 மணி வரை தீவிரமாக போராடி தீயை கட்டுக்குள் கொண்டுவந்தனா். தீயணைப்பு வீரா்கள் பூய்ச்சியடித்த தண்ணீரால், அந்த கடையின் அடித்தளத்தில் 10 அடி வரை தண்ணீா் தேங்கியது. இதனால், அதிகாலை 5 மணி வரை போராடி, இருவரின் உடலையும் தீயணைப்பு வீரா்கள் மீட்டனா். அவா்களின் உடல்கள் பிரேதப் பரிசோதனைக்கு அனுப்பிவைக்கப்பட்டுள்ளது. இந்த தம்பதியின் மகன் மும்பையில் பட்டையக் கணக்காளராக பணியாற்றி வருகிறாா் என்றனா்.

மகாராஷ்டிரத்தில் 6 போ் உயிரிழப்பு: மகாராஷ்டிர மாநிலம் மும்பை மற்றும் அதைச் சுற்றியுள்ள பகுதிகளில் தீபாவளி தினத்தன்று 140 தீ விபத்து சம்பவங்கள் பதிவாகின.

மும்பையின் தாராசிவ் பகுதியில் குடியிருப்புடன் கூடிய கடையில் ஞாயிற்றுக்கிழமை இரவு ஏற்பட்ட தீ விபத்தில், கடையின் மேல் தள குடியிருப்பில் ஆழ்ந்த உறக்கத்திலிருந்த ஒரே குடும்பத்தைச் சோ்ந்த 6 போ் மூச்சுத் திணறி உயிரிழந்தனா். பிளாஸ்டிக் மற்றும் எண்ணெய் பொருள்கள் விற்பனை கடை என்பதால், தீ மளமளவென பரவியுள்ளது. அக்கம்பக்கத்தினா் தீயை அணைக்கப் போராடியும் அவா்களைக் காப்பற்ற முடியவில்லை என்று போலீஸாா் தெரிவித்தா். தீ விபத்துக்கான காரணம் இன்னும் தெரியவரவில்லை. அதே நேரம், கடையில் மண் விளக்கு எரிந்த நிலையில் இருந்ததாக போலீஸாா் தரப்பில் தெரிவிக்கப்பட்டது.

மும்பையின் டோங்கிரி பகுதியில் டாக்டா் மகேஸ்வரி சாலையில் அமைந்துள்ள குடியிருப்புப் பகுதியில் ஞாயிற்றுக்கிழமை இரவு 10 மணியளவில் தீ விபத்து ஏற்பட்டது. இதில் பல கடைகள், குடிசை வீடுகள் எரிந்து சாம்பலாகின. மரச் சாமான்கள், சமையல் எரிவாயு சிலிண்டா்கள், ரயான கொள்கலன்கள், தாா்பாலின் சீட்டுகள் உள்ளிட்டவை எரிந்து நாசமாகின. தீயணைப்பு வீரா்கள் திங்கள்கிழை காலை 7.23 மணி வரை 9 மணி நேரம் போராடி தீயைக் கட்டுக்குள் கொண்டுவந்தனா்.

அதுபோல, அந்தேரியில் மரோல் ராணுவச் சாலையில் உள்ள கேரேஜில் இரவு 10.51 மணியளவில் தீ விபத்து ஏற்பட்டது. இதை 5 மணி நேரம் போராடி வீரா்கள் அணைத்தனா். வித்யா விஹாரில் ஜாலி ஜிம்கானா பகுதியில் உள்ள 10 அடுக்குமாடி வணிகக் கட்டடத்தில் இரவு 11.56 மணியளவில் தீவிபத்து ஏற்பட்டது. கட்டடத்தின் 7 மற்றும் 10 மாடியிலிருந்து தீ பரவியது. 6 மணி நேர போராட்டத்துக்குப் பின்னா், வீரா்கள் தீயை கட்டுக்குள் கொண்டுவந்தனா். இதில் உயிரிழப்புகள் எதுவும் பதிவாகவில்லை. தீ விபத்துக்கான காரணம் குறித்து விசாரணை நடைபெற்று வருகிறது என்று அதிகாரிகள் தெரிவித்தனா்.

நவ. 25 வரை வாண வெடிகளுக்குத் தடை: தொடா் தீ விபத்துகளைத் தொடா்ந்து, மும்பை மற்றும் அதைச் சுற்றியுள்ள பகுதிகளில் வரும் 25-ஆம் தேதி வரை வானில் உயரச் சென்று வெடிக்கக்கூடிய வாண வெடிகளுக்கு மும்பை பேரிடா் மேலாண்மை ஆணையம் திங்கள்கிழமை தடை விதித்து உத்தரவிட்டது.

மகாராஷ்டிர மாநிலம் தாணேயில் 17 அடுக்குமாடி குடியிருப்பில் தீபாவளி தினத்தன்று மிகப் பெரிய அளவில் தீ விப்த்து ஏற்பட்டது. கட்டடத்தின் 7-ஆவது மற்றும் 14-ஆவது மாடியிலிருந்து ஞாயிற்றுக்கிழமை இரவு 8.30 மணியளவில் தீ விபத்து ஏற்பட்டு, மற்ற மாடிகளுக்கும் பரவியுள்ளது. அதிஉயர தீயணைப்பு வாகனங்கள் வரவழைக்கப்பட்டு தீயை அணைக்கும் பணி தீவிரப்படுத்தப்பட்டது. தீ பரவிய மாடிகளில் சிக்கியிருந்த 50 குடியிருப்புவாசிகளை தீயணைப்பு வீரா்கள் பத்திரமாக மீட்டனா். தீவிர போராட்டத்துக்குப் பிறகு திங்கள்கிழமை அதிகாலை 2.30 மணியளவில் வீரா்கள் தீயை கட்டுக்குள் கொண்டுவந்தனா். இந்த தீ விபத்தில் உயிரிழப்புகள் எதுவும் இதுவரை பதிவாகவில்லை என்று அதிகாரிகள் தெரிவித்தனா்.

ஹரியாணாவில்... ஹரியாணா மாநிலம் அம்பாலாவில் லால் குா்தி பஜாா் பகுதியில் அமைந்துள்ள ஹோட்டலில் ஞாயிற்றுக்கிழமை நள்ளிரவு தீ விபத்து ஏற்பட்டது. தீயணைப்பு வீரா்கள் விரைந்து வந்து ஹோட்டலில் தங்கியிருந்த அனைவரையும் பத்திரமாக மீட்டனா். மாநில போக்குவரத்து அமைச்சா் அனில் விஜ் சம்பவ இடத்துக்கு நேரில் சென்று பாா்வையிட்டாா்.

தெலங்கானாவில்... தெலங்கானா மாநிலத்தில் திபாவளி தினத்தன்று வெடித்த பட்டாசு புகையால் 29 குழந்தைகள் உள்பட 60 பேருக்கு கண் பாதிப்பு ஏற்பட்டது.

இது குறித்து ஹைதராபாத் அரசு சரோஜினி தேவி கண் மருத்துவமனை அதிகாரிகள் திங்கள்கிழமை கூறுகையில், ‘பட்டாசு புகையால் கண் பாதிப்பு ஏற்பட்டு திங்கள்கிழமை காலை 9 மணி வரை 29 குழந்தைகள் உள்பட 60 போ் மருத்துவமனைக்கு சிகிச்சைக்காக வந்தனா். அவா்களில் 10 போ் உள் நோயாளிகளாக அனுமதிக்கப்பட்டு சிகிச்சை அளிக்கப்பட்டது. இவா்களில், 8 போ் தொடா் சிகிச்சையில் உள்ளனா். பட்டாசு தீ விபத்து சிகிச்சைக்கென மருத்துவமனையில் சிறப்பு ஏற்பாடுகள் செய்யப்பட்டுள்ளன’ என்றனா்.

ஜம்மு-காஷ்மீரில் 64 தீ விபத்துகள்: ஜம்மு-காஷ்மீரில் தீபாவளி தினத்தன்று பல்வேறு பகுதிகளில் 64 மிகப் பெரும் தீ விபத்து சம்பவங்கள் பதிவானதாக அதிகாரிகள் திங்கள்கிழமை தெரிவித்தனா்.

இதில், ஜம்மு மாவட்டத்தில் மட்டும் வரலாற்று சிறப்பு நேரு சந்தை கிடங்கில் ஏற்பட்ட பயங்கர தீ விபத்து உள்பட 30 தீ விபத்துகள் பதிவாகின.

சம்பா, கதுவா மாவட்டங்களில் 10 தீ விபத்துகளும், உதம்பூா், ரியாஸி மாவட்டங்களில் 8 தீ விபத்துகளும், கிஸ்த்வாா் மாவட்டம் மற்றும் ரஜெளரி-பூஞ்ச் சுற்றிய பகுதிகளில் தலா 3 தீ விபத்துகளும், ராம்பனில் ஒரு தீ விபத்து என மொத்தம் 64 தீ விபத்துகள் நிகழ்ந்தன.

இருந்தபோதும், ஜம்மு மாவட்டமே தீ விபத்தில் அதிகம் பாதிக்கப்பட்டதாக அதிகாரிகள் தெரிவித்தனா். ஜம்முவின் மிகப் பழைமையான வா்த்தக மையமாக திகழ்ந்து வரும் நேரு சந்தை கிடங்கில் ஞாயிற்றுக்கிழமை இரவு 9.15 மணியளவில் ஏற்பட்ட தீ விபத்தில் அங்கிருந்த உணவு தானியங்கள், சமையல் எண்ணெய் உள்பட்ட அத்தியாவசிய உணவுப் பொருள்களை விற்பனை செய்துவந்த 15 கடைகள் தீக்கிரையாகின. தீ மளமளவென அடுத்தடுத்த கடைகளுக்குப் பரவியது. பல்வேறு பகுதிகளிலிருந்து தீயணைப்பு வாகனங்கள் வரைவழைக்கப்பட்டு நள்ளிரவு வரை போராடி தீ கட்டுக்குள் கொண்டு வரப்பட்டது. இந்த தீ விபத்தால் வணிகா்களுக்கு மிகப் பெரிய அளவில் இழப்பு ஏற்பட்டிருக்கும் எனக் கூறப்படுகிறது.

இது குறித்து அந்த கிடங்கு சங்கத் தலைவா் தீபக் குப்தா கூறுகையில், ‘தீயணைப்பு வாகனங்கள் ஒன்றைமணி நேரம் தாமதமாக வந்ததே தீ மற்ற கடைகளுக்கும் பரவக் காரணம். மேலும், இரண்டு தீயணைப்பு வாகனங்கள் மட்டுமே முதலில் வந்தன. தீயணைப்பு வீரா்களின் அலட்சியம் குறித்து அரசு உரிய நடவடிக்கை எடுக்க வேண்டும்’ என்றாா்.

இதனிடையே, தீ விபத்துக்குள்ளான நேரு சந்தை கிடங்கை மாநில துணை முதல்வா் சுரீந்தா் செளதரி நேரில் ஆய்வு செய்தாா். தீ விபத்தில் பாதிக்கப்பட்ட வணிகா்களுக்கு உரிய இழப்பீடு வழங்க அரசு நடவடிக்கை மேற்கொள்ளும் என்று அவா் உறுதி தெரிவித்தாா்.

அதுபோல, ஜம்முவின் பஹாரி மொஹல்லா பகுதியில் அமைந்திருந்த துணிக் கடை மற்றும் காலணி கடைகள் இடம்பெற்றிருந்த 5 அடுக்குமாடி வணிக கட்டடமும் தீக்கிரையாகின.

ஷாலிமாரில் மருந்து கடை உள்ளிட்ட வணிக நிறுவனங்கள் இடம்பெற்றிருந்த 5 அடுக்குமாடி கட்டடமும், கங்க்யாலில் வன்பொருள் கிடங்கும் தீபாவளி தினத்தன்று தீ விபத்தில் சிக்கி சேதமடைந்தன. இந்த தீ விபத்துகளில் உயிரிழப்பு எதுவும் பதிவாகவில்லை என்று அதிகாரிகள் தெரிவித்தனா்.

குஜராத்தில்... குஜராத் மாநிலத்தில் சூரத், அகமதாபாத், ராஜ்கோட் உள்ளிட்ட பல்வேறு நகரங்களில் 366 பட்டாசு தீ விபத்து சம்பவங்கள் நிகழ்ந்தன. இதில் ராஜ்காட்டில் மட்டும் 182 தீ விபத்துகள் பதிவாகின. மாநிலம் முழுவதும் 62 பேருக்கு தீ காயங்கள் ஏற்பட்டு மருத்துவமனைகளில் சிகிச்சை பெற்றனா்.