முகப்பு
இந்தியா

உ.பி.யில் ஒவைஸிக்கு தவறுதலாக காவல் துறை அணிவகுப்பு மரியாதை! விசாரணைக்கு உத்தரவு!

உ.பி.யில் ஒவைஸிக்கு தவறுதலாக காவல் துறை அணிவகுப்பு மரியாதை...

21 நவம்பர் 2026, 10:32 pm
உ.பி.யில் ஒவைஸிக்கு தவறுதலாக காவல் துறை அணிவகுப்பு மரியாதை! விசாரணைக்கு உத்தரவு!
அசாதுதீன் ஒவைஸி - x
பகிர்:

உத்தர பிரதேசத்தில் மஜ்லீஸ் கட்சித் தலைவரும், எம்.பி.யுமான அசாதுதீன் ஒவைஸிக்கு தவறுதலாக காவல் துறை அணிவகுப்பு மரியாதை அளிக்கப்பட்டது குறித்து விசாரணைக்கு அரசு உத்தரவிட்டுள்ளது.

உத்தர பிரதேச மாநிலம், சஹாரன்பூரில் உள்ள அரசு இல்லத்துக்கு உச்சநீதிமன்ற நீதிபதி ஒருவா் சனிக்கிழமை காலை வர இருந்தாா். இதனால் அவருக்கு உரிய மரியாதை அளிக்க காவல் துறையினா் ஏற்பாடு செய்திருந்தனா்.

ஆனால், திட்டமிட்டபடி உச்சநீதிமன்ற நீதிபதி வராத நிலையில், அங்கு ஒவைஸி வந்துள்ளாா். அவரை அடையாளம் தெரியாத காவல் துறையினா், உச்சநீதிமன்ற நீதிபதிதான் வந்துள்ளாா் என்று நினைத்து, அவருக்கு அளிக்க வேண்டிய அணிவகுப்பு மரியாதையை ஒவைஸிக்கு அளித்துள்ளனா்.

Advertisement

Advertisement

உத்தர பிரதேச சட்டப்பேரவைத் தோ்தலில் ஆசாத் சமாஜ் கட்சியுடன் சோ்ந்து போட்டியிடத் திட்டமிட்டுள்ள ஒவைஸி, அக்கட்சித் தலைவா் சந்திரசேகா் ஆசாதுடன் சோ்ந்து செய்தியாளா்களுக்கு பேட்டியளிக்க திட்டமிட்டிருந்த நிலையில் அவா் அரசு இல்லம் வந்துள்ளாா். அவருக்கும் காவல் துறையினா் தனக்கு ஏன் அணிவகுப்பு மரியாதை அளிக்கின்றனா் என்பது புரியவில்லை. இருப்பினும் அவா் காவல் துறையினரின் அணிவகுப்பு மரியாதையை மறுக்காமல் ஏற்றுக் கொண்டாா்.

அணிவகுப்பு மரியாதை குறித்த தகவல் வெளியாகி உத்தர பிரதேசத்தில் பெரும் சா்ச்சையை ஏற்படுத்தவே, காவல் துறை சாா்பில் விசாரணைக்கு உத்தரவிடப்பட்டுள்ளது.

இது குறித்து சஹாரன்பூா் காவல் துறை வெளியிட்டுள்ள அறிவிப்பில், ‘இதுகுறித்து விசாரிக்குமாறு காவல் துறைக் கண்காணிப்பாளருக்கு (கிராமப்புறம்) உத்தரவிடப்பட்டுள்ளது. விசாரணைக்குப் பிறகு உண்மைகள், ஆதாரம் அடிப்படையில் சட்ட விதிக்குட்பட்டு நடவடிக்கை எடுப்பது உறுதி செய்யப்படும்’ எனத் தெரிவிக்கப்பட்டுள்ளது.

summary

Police accidentally accord a guard of honour to Owaisi in U.P - inquiry ordered