இனிதே வாழ இயற்கை உணவுகள்

இனிதே வாழ இயற்கை உணவுகள் - வெ. தமிழழகன்; பக்.168; ரூ.100; விகடன் பிரசுரம், சென்னை-2; )044-2852 4074.

உண்ணும் உணவுதான் நமது உடல் மற்றும் மன நலனுக்கு ஆதாரமாக இருக்கிறது. துரித உணவகங்கள் பெருகிக்கொண்டிருக்கும் இந்த வேளையில், காய், கனிகள் மற்றும் நீர், மண், காற்று போன்ற இயற்கை வளங்களை எவ்வாறு பயன்படுத்தி நலம் பெறலாம் என்பதை நூலாசிரியர் விளக்கியுள்ளார்.

நம் சமையல் அறையில் இருக்கும் பொருள்களின் மருத்துவ குணம், உணவில் அவற்றின் பயன்பாடு குறித்து தனித்தனியாக விளக்கியிருப்பதும், காய்கள், கனிகள் குறித்து ஒவ்வொன்றையும் தனித்தனியாக அலசியிருப்பதும் வாசகருக்குத் தெளிவான புரிதலை ஏற்படுத்துகின்றன. ஒவ்வொருவரும் தனக்கான காய், கனிகளைத் தேர்வு செய்வது இந்நூலைப் படித்தால் எளிதானதாகிவிடுகிறது.

பிராணாயாமம், மண் பற்றுப் போடுதல், நீர் அருந்தும் முறைகள் என இயற்கையையும் நாம் பயன்படுத்த முடியும். கடைசியாக, சில நோய்களுக்கான எளிய உணவு மருத்துவமும் தரப்பட்டுள்ளது. இயற்கை உணவு குறித்து அறிய விரும்புவோர் இந்தப் புத்தகத்தைப் படித்தால் போதும்.