திருமலையில் இலங்கைப் பிரதமர்

ஏழுமலையானை வழிபட இலங்கைப் பிரதமர் ரணில் விக்ரமசிங்க தன் மனைவியுடன் வியாழக்கிழமை திருமலைக்கு வந்தார்.
அவர் ஏழுமலையானை ஆண்டிற்கு ஒரு முறை வழிபட்டு வருகிறார். அதன்படி அவர் தன் மனைவி மைத்ரி விக்ரமசிங்கவுடன் இலங்கையிலிருந்து தனி விமானம் மூலம் வியாழக்கிழமை மதியம் சென்னை விமான நிலையத்தை அடைந்தார். அங்கிருந்து இந்திய விமானப்படை ஹெலிகாப்டரில் திருப்பதி விமான நிலைதுக்கு வந்தார்.
அங்கு விக்ரமசங்கவை ஆந்திர அரசு சார்பில் சுரங்கத் துறை அமைச்சர் சுஜயா கிருஷ்ணரங்காராவ், சித்தூர் மாவட்ட ஆட்சியர் பிரத்யும்னா, திருப்பதி எஸ்.பி. அபிஷேக் மொஹந்தி மற்றும் அதிகாரிகள் மலர்ச் செண்டு அளித்து வரவேற்று திருமலைக்கு சாலை வழியாக அழைத்துச் சென்றனர். 
திருமலையை அடைந்த அவர்களை தேவஸ்தான அதிகாரிகள் வரவேற்று ஸ்ரீகிருஷ்ணா விருந்தினர் மாளிகையில் தங்கும் வசதி செய்தளித்தனர். இரவு திருமலையில் தங்கும் அவர்கள் வெள்ளிக்கிழமை காலை வி.ஐ.பி பிரேக் தரிசனத்தில் ஏழுமலையானை தரிசிக்க உள்ளனர். இலங்கைப் பிரதமரின் வருகையை ஒட்டி திருப்பதி மற்றும் திருமலையில் பாதுகாப்பு ஏற்பாடுகள் பலப்படுத்தப்பட்டன.