திருத்தணி: தெப்போற்சவத்தில் வலம் வந்த முருகப்பெருமான்

திருத்தணி முருகன் கோயிலில் நடைபெற்று வரும் ஆடிக்கிருத்திகை விழாவில் இரண்டாம் நாளான திங்கள்கிழமை சரவணப்பொய்கையில் தெப்போற்சவத்தில் வள்ளி, தெய்வானையுடன் முருகப்பெருமான் வலம் வந்து பக்தர்களுக்கு அருள்பாலித்தார். இதில் ஆயிரக்கணக்கான பக்தர்கள் கலந்துகொண்டு சுவாமியை வழிபட்டனர்.
திருத்தணி முருகன் கோயிலில், ஆகஸ்ட் 3-ஆம் தேதி முதல் 7-ஆம் தேதி வரை ஆடிக்கிருத்திகை மற்றும் மூன்று நாள் தெப்பல் விழா நடந்து வருகிறது. இதில், ஞாயிற்றுக்கிழமை முதல் நாள் தெப்பல் உற்சவம் இரவு 7.30 மணிக்கு நடைபெற்றது. திங்கள்கிழமை இரண்டாம் நாள் தெப்பல் உற்சவத்தையொட்டி, அதிகாலை 3 மணிக்கு மூலவருக்கு சிறப்பு அபிஷேகம் நடைபெற்றது. 
தொடர்ந்து, மூலவருக்கு தங்கக் கீரிடம், தங்கவேல், பச்சைமாணிக்க மரகதக்கல் மற்றும் வைர ஆபரணங்கள் அணிவித்து சிறப்பு அலங்காரம் மற்றும் தீபாராதனை நடைபெற்றது. அப்போது, ஆயிரத்திற்கும் மேற்பட்ட பக்தர்கள் காவடிகளுடன் மலைக்கோயிலுக்கு வந்து சுவாமியை வழிபட்டனர்.
மாலை 6.30 மணிக்கு உற்சவர் முருகப்பெருமான் வள்ளி, தெய்வானையுடன் மலைப்படிகள் வழியாக வந்து, மலையடி வாரத்தில் உள்ள சரவணப்பொய்கையில் அலங்கரிக்கப்பட்ட தெப்பத்தில் எழுந்தருளினார். 
அங்கு சிறப்பு தீபாராதனை நடைபெற்றது. பின்னர், இரவு 7.30 மணிக்கு பக்தி இன்னிசைக்கச்சேரியுடன் தெப்பம் உலா வந்தது.
இந்த இரண்டாம் நாள் விழாவில், உற்சவர் ஐந்து முறை குளத்தைச் சுற்றிவந்து பக்தர்களுக்கு அருள்பாலித்தார். அப்போது ஆயிரக்கணக்கான பக்தர்கள் குளக்கரைப் படிகளில் குவிந்திருந்தனர். சில பக்தர்கள் கற்பூரம் ஏற்றி, தேங்காய் உடைத்து பூஜைகள் செய்து வழிபட்டனர். செவ்வாய்க்கிழமை (ஆகஸ்ட் 7) மாலை மூன்றாம் நாள் தெப்பல் உற்சவத்துடன் ஆடிக்கிருத்திகை விழா நிறைவடைகிறது. இதற்கான ஏற்பாடுகளை கோயில் தக்கார் வே. ஜெயசங்கர், இணை ஆணையர் செ.சிவாஜி மற்றும் ஊழியர்கள் உள்ளிட்டோர் செய்திருந்தனர். 
திருப்போரூர் கோயிலில்...
 திருப்போரூர் கந்தசாமி கோயிலில் ஆடிக் கிருத்திகை விழாவையொட்டி ஒரு லட்சத்துக்கும் மேற்பட்ட பக்தர்கள் சுவாமி தரிசனம் செய்தனர்.
காஞ்சிபுரம் மாவட்டம், செங்கல்பட்டை அடுத்த திருப்போரூரில் புகழ்பெற்ற கந்தசாமி கோயில் அமைந்துள்ளது. 
ஆடிக் கிருத்திகையையொட்டி முருகனுக்கு சிறப்பு அபிஷேகம் நடைபெற்றது. 
முத்தங்கி சேவை அலங்காரத்தில் முருகன், வள்ளி தெய்வானை காட்சியளிக்க சிறப்பு பூஜைகள் நடத்தப்பட்டு, மகாதீபாராதனை காட்டப்பட்டது. உற்சவ மூர்த்திக்கும் சிறப்பு அபிஷேக, அலங்காரம் நடைபெற்றது. 
பக்தர்கள் தங்களது வேண்டுதலை நிறைவேற்றும் வகையில் குழந்தைகள் முதல் பெரியவர்கள் வரை மொட்டை அடித்துக் கொண்டனர். ஏராளமான குழந்தைகள், பெண்கள், கன்னிப்பெண்கள், ஆண்கள் ஆகியோர் நாக்கில் அலகு குத்தியும், பால்காவடி, பன்னீர் காவடி, புஷ்பக் காவடி, மயில் காவடி ஆகியவற்றை எடுத்து நேர்த்திக் கடனை நிறைவேற்றினர். ஆண்கள் உடலில் வேல்குத்தி தங்களது நேர்த்திக்கடனை நிறைவேற்றினர். 
காவல் ஆய்வாளர் ரமேஷ் தலைமையில் ஏராளமான போலீஸார் எந்தவித அசம்பாவிதமும் நிகழாத வண்ணம் பாதுகாப்புப் பணியில் ஈடுபட்டனர். 
இதேபோல், செங்கல்பட்டு பகுதியில் உள்ள முருகன் கோயில்களிலும் ஆடிக் கிருத்திகை விழாவையொட்டி சிறப்பு அபிஷேக அலங்காரம், சுவாமி வீதியுலா ஆகியவை நடைபெற்றன.
வல்லக்கோட்டையில்...
ஆடிக் கிருத்திகையை முன்னிட்டு வல்லக்கோட்டை வள்ளி தெய்வசேனா சமேத சுப்பிரமணிய சுவாமி கோயிலில் கடந்த ஞாயிற்றுக்கிழமை இரவு திருவீதி உலா நடைபெற்றது. இதில் உற்சவர் சிறப்பு அலங்காரத்தில் திருவீதியுலா வந்து பக்தர்களுக்கு காட்சியளித்தார்.