மிட்செல் ஸ்டார்க் காயத்தால் அவதி: ஆஸி.க்கு பின்னடைவா?

ஆஸ்திரேலிய கிரிக்கெட் அணியின் முன்னணி வேகப்பந்து வீச்சாளர் மிட்செல் ஸ்டார்க் விலா எலும்பு காயத்தால் அவதியடைந்து வருவதாக விக்கெட் கீப்பர் அலெக்ஸ் கேரி தெரிவித்துள்ளார்.

இதனால், வருகிற வெள்ளிக்கிழமை நடைபெறும் இந்தியா - ஆஸ்திரேலியா மோதும் சிட்னியில் நடைபெறும் 5-வது மற்றும் கடைசி போட்டியில் ஸ்டார்க் விளையாடுவாரா என்ற எதிர்பார்ப்பு அதிகரித்துள்ளது.

34 வயதான மிட்செல் ஸ்டார்க் பாக்ஸிங் டே டெஸ்ட்டிலும் காயத்தால் அவதிப்பட்டு வந்தார். இருப்பினும், அவர் பிசியோதெரபிஸ்ட்டின் உதவியால் அவரால் நன்கு பந்துவீச முடிந்தது.

ஸ்டார்க்கின் காயம் குறித்து ஆஸ்திரேலிய விக்கெட் கீப்பர் அலெக்ஸ் கேரி செய்தியாளர்கள் சந்திப்பில் கூறுகையில், “அவர் நலமுடன் இருக்கிறார். காயத்தில் இருந்து மீண்டுவிடுவார். நான் ஸ்டார்க்குடன் நீண்டகாலமாக விளையாடி வருகிறேன்.

உலகில் உள்ள விளையாடுவதற்கு மிகவும் கடினமான வீரர்களில் ஸ்டார்க்கும் ஒருவர். அவர் விலா எலும்பு காயத்தால் அவதியடைந்தாலும்கூட அவர் விளையாடத் தயாராக இருப்பார்” எனக் கூறினார்.

2014-2015 ஆம் ஆண்டுக்குப் பின்னர், பார்டர் - கவாஸ்கர் கோப்பை வெல்லுவதற்கு, ஆஸ்திரேலிய அணி 5-வது போட்டியில் வெற்றி அல்லது டிரா செய்ய வேண்டியது கட்டாயம். இருப்பினும், இந்திய அணி கடைசிப் போட்டியில் வெற்றிபெற்றால், 5-வது முறையாக கோப்பையைத் தக்கவைத்துக்கொள்ளும்.

ஒருவேளை மிட்செல் ஸ்டார்க்கு ஓய்வு அளிக்கப்பட்டால், அவருக்குப் பதிலாக ஜே ரிச்சர்ட்சன் களமிறங்குவார் என்று எதிர்பார்க்கப்படுகிறது.

இதுகுறித்து ஜே ரிச்சர்ட்சன் கூறுகையில், “விளையாடுவது பற்றி நான் அதிகம் சிந்திக்க விரும்பவில்லை. ஆனால், வாய்ப்பு கிடைத்தால் என்னால் முடிந்த அனைத்தையும் செய்வேன்” என்றார்.

அவர் கடைசியாக 2021 ஆம் ஆண்டு அடிலெய்டில் நடந்த இங்கிலாந்துக்கு எதிரான பாக்ஸிங் டே டெஸ்ட் போட்டியில் 5 விக்கெட்டுகளை வீழ்த்தியிருந்தது குறிப்பிடத்தக்கது.