சென்னையில் நுண்ணுயிர் சிறுதொழில் பயிற்சி மையம்: மத்திய அமைச்சர் தகவல்

சென்னையில் நுண்ணுயிர் சிறுதொழில் பயிற்சி மையம் அமைக்க மத்திய அரசு நடவடிக்கை எடுத்து வருவதாக மத்திய அமைச்சர் கல்ராஜ்மிஸ்ரா தெரிவித்தார்.
 ராமேசுவரம் ராமநாதசுவாமி திருக்கோயிலுக்கு, மத்திய சிறுகுறு தொழில்துறை அமைச்சர் கல்ராஜ் மிஸ்ரா தனது குடும்பத்தினருடன் திங்கள்கிழமை வந்திருந்தார். அக்னி தீர்த்தக்கடல், புனித தீர்த்தங்களில் நீராடிய பின்னர், திருக்கோயிலில் சுவாமி, அம்மன் சன்னதியில் நடைபெற்ற சிறப்பு பூஜைகளில் கலந்து கொண்டு தரிசனம் செய்தார்.
 பின்னர், முகுந்தராயர் சத்திரம் முதல் தனுஷ்கோடி வரை மத்திய அரசு சார்பில் நடைபெற்று வரும் சாலை அமைக்கும் பணிகளையும் பார்வையிட்டார்.
 அதன் பின்னர், செய்தியாளர்களிடம் அமைச்சர் தெரிவித்ததாவது: தமிழகத்தில் ஆயிரக்கணக்கான இளைஞர்களுக்கு வேலைவாய்ப்பை ஏற்படுத்தும் வகையில் சென்னையில் நுண்ணுயிர் சிறு தொழில் பயிற்சி மையம் அமைக்க மத்திய அரசு நடவடிக்கை எடுத்து வருகிறது. புதுவையில் முதலீட்டாளர் மாநாடு நடத்த திட்டமிடப்பட்டுள்ளது.
 தமிழ்நாடு, கேரளா, கர்நாடகா உள்ளிட்ட தென் மாநிலங்களின் கிராமங்களில் கயிறு திரித்தல் தொழிலை மேம்படுத்த பல்வேறு நடவடிக்கைகள் எடுக்கப்படுகின்றன.
 தனுஷ்கோடி முதல் இலங்கை தலைமன்னார் வரை கடல்வழிப் பாலம் அமைக்கும் பணிகள் தொடங்குவதற்கு மத்திய அமைச்சர் நிதின்கட்கரி நடவடிக்கை எடுத்து வருவதாகவும், இதை தீவிரப்படுத்த வலியுறுத்துபோவதாகவும் அவர் தெரிவித்தார்.
 பேட்டியின்போது தேசியக்குழு உறுப்பினர் முரளீதரன் மற்றும் நகர் நிர்வாகிகள் முத்துச்செல்வம், நாகேந்திரன் உள்ளிட்டோர் உடனிருந்தனர்.