மேட்டூர் அணையில் வெளியே தெரியும் கிறிஸ்தவ ஆலய கோபுரம்

மேட்டூர் அணையின் நீர்மட்டம் 78 அடியாகக் குறைந்ததையடுத்து, பண்ணவாடி பரிசல்துறையில் தண்ணீரில் மூழ்கியிருந்த கிறிஸ்தவ ஆலயத்தின் கோபுரம் திங்கள்கிழமை வெளியே தெரிந்தது.
 காவிரியின் நீர்ப் பிடிப்புப் பகுதிகளில் மழை குறைந்ததால், மேட்டூர் அணைக்கு வரும் நீரின் அளவு வெகுவாக குறைந்துள்ளது. ஞாயிற்றுக்கிழமை காலை மேட்டூர் அணைக்கு நொடிக்கு 2,807 கனஅடியாக இருந்த நீர்வரத்து திங்கள்கிழமை காலை 2,436 கன அடியாகக் குறைந்தது.
 காவிரி டெல்டா பாசனத்துக்கும், கிழக்கு, மேற்கு கால்வாய் பாசனத்துக்கும் மேட்டூர் அணையில் இருந்து நொடிக்கு 15,700 கன அடி தண்ணீர் திறந்துவிடப்படுகிறது. நீரவரத்தைக் காட்டிலும் அணையில் இருந்து திறந்துவிடப்படும் நீரின் அளவு அதிகமாக இருப்பதால், அணையின் நீர்மட்டம் வெகுவாகக் குறைந்து திங்கள்கிழமை காலை 78.02 அடியானது. இதையடுத்து, மேட்டூர் அணை பகுதியான பண்ணவாடி பரிசல்துறையில் தண்ணீரில் மூழ்கியிருந்த கிறிஸ்தவ ஆலய கோபுரம் வெளியே தெரிய தொடங்கியுள்ளது. நீர்மட்டம் மேலும் குறையும் போது, அணை தண்ணீரில் மூழ்கியுள்ள ஜலகண்டேஸ்வரர் கோயில், கீரைக்காரனூர் சோழப்பாடி வீரபத்திரன் கோயில், மீனாட்சியம்மன் கோயில் ஆகியவையும் வெளியே தெரியும்.