வங்கக் கடலில் குறைந்த காற்றழுத்தத் தாழ்வுப் பகுதி

வங்கக் கடலில் புதிதாக குறைந்த காற்றழுத்தத் தாழ்வுப் பகுதி உருவாகியுள்ளதாக வானிலை ஆய்வு மையம் தெரிவித்தது.
 இதுகுறித்து வானிலை ஆய்வு மைய அதிகாரி ஒருவர் கூறியதாவது: வெப்பச் சலனம் காரணமாக, தமிழகம், புதுச்சேரியில் ஆங்காங்கே மழை பெய்து வருகிறது.
 தென் மேற்குப் பருவ மழை கர்நாடகம், கேரளம், ஆந்திரம், தெலங்கானா ஆகிய மாநிலங்களில் தீவிரம் அடைந்துள்ளது.
 காற்றழுத்தத் தாழ்வுப் பகுதி: இந்த நிலையில், மேற்கு மத்திய வங்கக் கடலில், வட மேற்குப் பகுதியில் குறைந்த காற்றழுத்தத் தாழ்வுப் பகுதி உருவாகி இருக்கிறது.
 இந்தக் குறைந்த காற்றழுத்தத் தாழ்வுப் பகுதி இன்னும் வலுவடையவில்லை. இருப்பினும், ஓரிரு நாள்களில் வலுவடையும் என எதிர்பார்க்கிறோம்.
 வலுவடைந்த பின்னரே, எந்தத் திசை நோக்கி நகர்கிறது என்பதைப் பொருத்து, தமிழகத்தில் மழை பெய்யுமா என்பதைக் கூற முடியும். காற்றழுத்தத் தாழ்வுப் பகுதியானது, தற்போது தொடக்க நிலையில் உள்ளதால் புயலாக மாறுமா என்பதையும் உறுதிப்படுத்த முடியாது.
 அடுத்த 24 மணி நேரத்தில், தமிழகம், புதுச்சேரியில் ஆங்காங்கே இடியுடன் கூடிய மழை பெய்வதற்கான வாய்ப்புள்ளது.
 சென்னை மாநகரைப் பொருத்தவரை, வானம் பொதுவாக மேகமூட்டத்துடன் காணப்படும். மாலை அல்லது இரவு நேரங்களில், நகரின் ஒரு சில பகுதிகளில் இடியுடன் கூடிய மழை பெய்யும். நகரின் அதிகபட்ச வெப்பநிலை 93 டிகிரியாக இருக்கும் என்றார் அவர்.