இன்று தேசிய கைத்தறி தினம்: நெசவாளர்களுக்கு ஆதரவு அளியுங்கள்: முதல்வர் பழனிசாமி

கைத்தறி நெசவாளர்களுக்கு பொதுமக்கள் ஆதரவு அளிக்க வேண்டுமென முதல்வர் எடப்பாடி கே.பழனிசாமி வேண்டுகோள் விடுத்துள்ளார்.
இதுகுறித்து அவர் திங்கள்கிழமை வெளியிட்ட வாழ்த்துச் செய்தி: கைத்தறித் தொழிலை மேம்படுத்தி, கைத்தறி நெசவாளர்களின் பெருமையை உயர்த்தும் நோக்கத்திலும் ஒவ்வொரு ஆண்டும் ஆகஸ்ட் 7-ஆம் தேதி தேசிய கைத்தறி தினம் கடைப்பிடிக்கப்பட்டு வருகிறது.
கைத்தறி தொழில், விவசாயத்துக்கு அடுத்தபடியாக ஊரக மற்றும் நகர்ப்புற பகுதிகளில் உள்ள மக்களுக்கு வாழ்வாதாரம் வழங்குவதில் முக்கியப் பங்கு வகிக்கிறது. தமிழகத்தில் சுமார் 1.90 லட்சம் நெசவாளர் குடும்பங்கள் உள்ளதுடன், அந்தத் தொழில் 3.19 லட்சம் நெசவாளர்கள், நெசவு சார்ந்த உப தொழில் புரிவோருக்கு வேலைவாய்ப்பு வழங்கி வருகிறது.
இத்தகைய சிறப்புமிக்க கைத்தறித் தொழிலின் வளர்ச்சிக்காக தமிழக அரசு பல்வேறு நடவடிக்கைகளை எடுத்து வருகிறது. 1.55 கோடி குடும்பங்கள் பயன்பெறும் வகையில், விலையில்லாத வேட்டி, சேலை திட்டம் உள்ளிட்ட பல்வேறு திட்டங்கள் செயல்படுத்தப்பட்டு வருகின்றன.
ஆதரவு அளியுங்கள்: நெசவாளர்களின் வாழ்வாதாரத்தை உயர்த்திடும் வகையில், தமிழகத்தில் உள்ள அனைத்துப் பிரிவு மக்களும், கைத்தறி நெசவாளர் கூட்டுறவு சங்கங்களின் விற்பனை நிலையங்களிலும், கோ-ஆப்டெக்ஸ் விற்பனை நிலையங்களிலும் விற்பனை செய்யப்படும் பட்டு, பருத்தி கைத்தறி ரகங்களை வாங்கி அணிந்து கைத்தறி நெசவாளர்களுக்கு ஆதரவு அளிக்க வேண்டும் என முதல்வர் தெரிவித்துள்ளார்.