மேட்டூர் அணைக்கு நீர்வரத்து 9,516 கன அடியாகச் சரிவு

மேட்டூர் அணைக்கு வரும் நீரின் அளவு நொடிக்கு 9,516 கன அடியாகச் சரிந்தது.
கர்நாடக மாநிலத்தில் உள்ள கபினியின் நீர் பிடிப்புப் பகுதிகளில் மழை குறைந்த காரணத்தால், கபினிக்கு வரும் நீர்வரத்து சரிந்தது. இதனால் அங்கிருந்து வெளியேற்றப்படும் உபரிநீரின் அளவு வெகுவாகக் குறைக்கப்பட்டது. உபரி நீர் திறப்பு குறைக்கப்பட்டதால், மேட்டூர் அணைக்கு வரும் நீரின் அளவு கடந்த மூன்று நாள்களாக படிப்படியாக குறைந்து வருகிறது.
திங்கள்கிழமை காலை 13,696 கன அடியாக வந்து கொண்டிருந்த நீர்வரத்து செவ்வாய்க்கிழமை காலை நொடிக்கு 9,516 கன அடியாகச் சரிந்தது. செவ்வாய்க்கிழமை காலை மேட்டூர் அணையின் நீர்மட்டம் 55.82 அடியாக இருந்தது. அணையிலிருந்து குடிநீர்த் தேவைக்காக நொடிக்கு 500 கன அடி வீதம் தண்ணீர் வெளியேற்றப்பட்டது. அணையின் நீர் இருப்பு 21.67 டி.எம்.சி.