மேட்டூர் அணைக்கு நீர்வரத்து மேலும் அதிகரிப்பு

மேட்டூர் அணைக்கு நீர்வரத்து 1,970 கனஅடியாக அதிகரித்துள்ளது.
கடந்த சில தினங்களாக காவிரியின் நீர்ப்பிடிப்புப் பகுதிகளிலும், காவிரியின் உப நதியான பாலாற்றின் நீர்ப் பிடிப்புப் பகுதிகளிலும் மழை பெய்து வருகிறது. 
இந்த மழையின் காரணமாக மேட்டூர் அணைக்கு நீர்வரத்து படிப்படியாக அதிகரித்து வருகிறது. இந்த நிலையில், செவ்வாய்க்கிழமை காலை அணைக்கு நீர்வரத்து 512 கனஅடியிலிருந்து 1,449 கனஅடியாக அதிகரித்தது. இது புதன்கிழமை காலை நொடிக்கு 1,970 கனஅடியாக அதிகரித்துள்ளது.
அணையிலிருந்து குடிநீர்த் தேவைக்காக நொடிக்கு 500 கனஅடி வீதம் தண்ணீர் திறக்கப்படுகிறது. குடிநீருக்குத் திறக்கப்படும் நீரின் அளவைவிட, அணைக்கு வரும் நீரின் அளவு அதிகமாக இருப்பதால், அணையின் நீர்மட்டம் 35.03 அடியாக உயர்ந்துள்ளது. அணையின் நீர் இருப்பு 9.67 டி.எம்.சி.யாக இருந்தது.