கருணாநிதி ஒரு தலைசிறந்த தலைவர்: கோபாலபுரத்தில் அஞ்சலி செலுத்திய பிரணாப் முகர்ஜி புகழாரம்

சென்னை கோபாலபுர இல்லத்தில் கருணாநிதிக்கு அஞ்சலி செலுத்திய பிரணாப் முகர்ஜி, கருணாநிதி தலைசிறந்த தலைவர் என்று புகழாரம் சூட்டினார். 

சென்னை வந்துள்ள பிரணாப் முகர்ஜி கோபாலபுரத்தில் உள்ள கருணாநிதியின் இல்லத்துக்கு வியாழக்கிழமை இரவு 8.40 மணியளவில் வந்தார். அவரை திமுக தலைவர் மு.க.ஸ்டாலின், மாநிலங்களவை திமுக குழுத் தலைவர் கனிமொழி ஆகியோர் வரவேற்றனர். 

அங்கு பிரணாப் முகர்ஜி கருணாநிதியின் படத்துக்கு மலர் தூவி மரியாதை செலுத்தினார். அதைத் தொடர்ந்து மு.க.ஸ்டாலின் உள்ளிட்டோருக்கு ஆறுதல் கூறினார்.

இதையடுத்து, அவர் செய்தியாளர்களிடம் கூறியது: 

"கருணாநிதியின் இறுதிச் சடங்கில் பங்கேற்க இயலவில்லை. சென்னைக்கு வர வாய்ப்பு கிடைக்கும்போது, கருணாநிதியின் இல்லத்துக்குச் சென்று, தலைசிறந்த தலைவரான அவருக்கு அஞ்சலி செலுத்த நினைத்தேன்.

எனது குடியரசுத் தலைவர் பதவிக் காலம் முடிந்த பிறகு, இப்போதுதான் முதல்முறையாக சென்னைக்கு வந்துள்ளேன். மு.க.ஸ்டாலின், கனிமொழியைச் சந்தித்துப் பேசியதில் மகிழ்ச்சி.

1970-ஆம் ஆண்டு முதல் கருணாநிதியுடன் நட்பிலிருந்த காரணத்தினால், அவருக்கு எனது அஞ்சலியைச் செலுத்துவதற்காக மட்டுமே இல்லத்துக்கு வந்துள்ளேன். சுமார் 48 ஆண்டுகள் அவருடன் நட்புறவில் இருந்தேன். அந்தச் சமயங்களில் கருணாநிதியைச் சந்திப்பதற்காக அவரது இல்லத்துக்குப் பலமுறை வந்துள்ளேன்" என்றார். 

பிரணாப் முகர்ஜியுடன் தமாகா தலைவர் ஜி.கே.வாசனும் உடன் வந்தார்.