ஹிந்தி வெறியர்கள்தான் தேசதுரோகிகள்: முதல்வர் ஸ்டாலின்

உண்மையான பேரினவாதிகளும் தேசதுரோகிகளும் ஹிந்தி வெறியர்கள்தான் என்று தமிழக முதல்வர் மு.க.ஸ்டாலின் தெரிவித்துள்ளார்.

மும்மொழிக் கல்விக் கொள்கையை ஏற்றுக் கொள்ளாததால், தமிழகத்துக்கான கல்வி நிதியை விடுவிக்க மத்திய அரசு மறுப்பு தெரிவித்துள்ளது. மத்திய அரசின் இந்த நடவடிக்கைக்கு தமிழக அரசியல் கட்சிகள் கடும் கண்டனங்களை தெரிவித்து வருகின்றனர்.

இதனிடையே, மும்மொழிக் கொள்கையால் தாய்மொழிக்கு எந்த பாதிப்பும் இல்லை என்றும் பிரதமர் மோடிக்கு தமிழ் மீது மிகுந்த அக்கறை இருப்பதாகவும் பாஜக தலைவர்கள் தெரிவித்து வருகின்றனர்.

இதையும் படிக்க : 2 மாதங்களில் 550 நீதிமன்ற அவமதிப்பு வழக்குகள்: உயா்நீதிமன்றம் அதிருப்தி

இந்த நிலையில், முதல்வர் மு.க.ஸ்டாலின் எக்ஸ் தளத்தில் வியாழக்கிழமை வெளியிட்ட பதிவில் தெரிவித்திருப்பதாவது:

”தமிழ்நாட்டில் தமிழருக்கு உரிய இடத்தைக் கோரிய 'குற்றத்துக்காக' சில மதவெறியர்கள் எங்களை பேரினவாதிகள் மற்றும் தேசவிரோதிகள் என்று முத்திரை குத்தும் வேளையில், ’சலுகைகளுக்குப் பழகும்போது, ​​சமத்துவம் ஒடுக்குமுறையாக உணர்கிறது’ என்ற பிரபலமான மேற்கோள் எனக்கு நினைவுக்கு வருகிறது.

கோட்சேவின் சித்தாந்தத்தை சிறப்பிக்கும் மக்களே, சீன ஆக்கிரமிப்பு, வங்கதேச விடுதலைப் போர் மற்றும் கார்கில் போரின்போது அதிக நிதியை வழங்கிய திமுக மற்றும் அதன் அரசாங்கத்தின் தேசபக்தியைக் கேள்வி கேட்கத் துணிச்சல் வேண்டும். அவர்களின் சித்தாந்த மூதாதையர் காந்தியைக் கொன்றவர்.

மொழியியல் சமத்துவத்தைக் கோருவது பேரினவாதம் அல்ல. பேரினவாதம் எப்படி இருக்கும் என்பதை நீங்கள் அறிய விரும்புகிறீர்களா?

140 கோடி குடிமக்களை நிர்வகிக்கும் மூன்று குற்றவியல் சட்டங்களை தமிழர்கள் உச்சரிக்கவோ அல்லது படித்து புரிந்துகொள்ளவோ ​​முடியாத மொழியில் பெயரிடுவதுதான் பேரினவாதம். தேசத்துக்கு அதிகளவில் பங்களிக்கும் அரசை இரண்டாம் தர குடிமக்களாகக் கருதி, தேசிய கல்விக் கொள்கை என்ற விஷத்தை விழுங்க மறுத்ததற்காக நியாயமான நிதியை மறுக்கிறது.

ஒன்றை திணிப்பது மூலம் பகைமை வளரும். பகைமை ஒற்றுமையை அச்சுறுத்துகிறது. எனவே, உண்மையான பேரினவாதிகள் மற்றும் தேசவிரோதிகள் இந்தி வெறியர்கள்தான். அவர்கள் உரிமையை இயற்கையானது என்று கருதுகிறார்கள், ஆனால் நமது எதிர்ப்பை துரோகம் என்கிறார்கள்” எனக் குறிப்பிட்டுள்ளார்.