கிராமப்புற வேலை உறுதித் திட்டத்துக்காக கூடுதல் நிதியை பெற வேண்டும்: அன்புமணி

கிராமப்புற வேலை உறுதித் திட்டத்துக்காக மத்திய அரசிடம் இருந்து கூடுதல் நிதியைப் பெற வேண்டும் என பாமக தலைவா் அன்புமணி வலியுறுத்தினா்.

இது குறித்து அவா் வெளியிட்ட அறிக்கை:

ஆட்சிக்கு வந்தால் கிராமப்புற மக்களுக்கு வழங்கப்படும் வேலை நாள்களின் எண்ணிக்கை 150 நாளாக உயா்த்தப்படும் என தவெக தோ்தல் அறிக்கையில் வாக்குறுதி அளித்திருந்தது. அந்தத் திட்டத்தில் 125 வேலை நாள்களாக மத்திய அரசு உயா்த்தி உள்ளது.

இந்நிலையில், வாக்குறுதி அளித்தபடி, கூடுதலாக 25 நாள்கள் வேலை வழங்குவதற்காக தமிழக அரசு தற்போது ரூ.100 கோடியை ஒதுக்கியுள்ளது. இந்தத் திட்டப்படி, ஒருவருக்கு ஒரு நாளைக்கு ரூ.532-ஐ மத்திய, மாநில அரசுகள் இணைந்து வழங்க உள்ளது.

தமிழகத்தில் மொத்தம் 69.11 லட்சம் குடும்பங்களுக்கு இந்தத் திட்டத்தின்படி வேலை வழங்க வேண்டியுள்ள நிலையில், அவா்கள் அனைவருக்கும் வேலை வழங்குவதற்காக ஒரு நாளைக்கு ரூ.367.68 கோடி தேவைப்படும். கூடுதலாக 25 நாள் வேலைவாய்ப்பை தமிழக அரசுதான் வழங்குகிறது என்பதால், அதற்கான அனைத்து செலவுகளையும் மாநில அரசுதான் ஏற்கவேண்டும்.

அதன்படி, ஒரு நாளைக்கு ரூ.367.68 கோடி வீதம் 25 நாள்களுக்கு வேலை வழங்க குறைந்தது ரூ.9,192 கோடி தேவைப்படும். ஆனால், தமிழக அரசு ஒதுக்கியுள்ள ரூ.100 கோடியைக் கொண்டு, ஒரே ஒரு நாளைக்குக் கூட வேலை வழங்க முடியாது. எனவே, மத்திய அரசிடம் பேச்சு நடத்தி மாநில அரசுக்கான நிதியை உயா்த்தி வழங்க தமிழக அரசு நடவடிக்கை எடுக்க வேண்டும் எனத் தெரிவித்துள்ளாா்.