சென்னையில் இன்று மழை எப்படி இருக்கும்? மற்ற மாவட்டங்களில்..?

சென்னையில் இன்று (அக். 23) லேசான தூரல் மழை இருக்கும் என்றும் அக். 24, 25, 26 தேதிகளில் சென்னையில் நல்ல மழையை எதிர்பார்க்கலாம் என்றும் தமிழ்நாடு வெதர்மேன் பிரதீப் ஜான் கூறியுள்ளார்.

அவர் தனது எக்ஸ் பக்கத்தில்,

"தமிழ்நாட்டிற்கு மீண்டும் ஒரு நல்ல நாள். மழையுடன் சென்னைக்கு விடிந்திருக்கிறது.

சென்னையில்....

சில மணி நேரங்களுக்குப் பிறகு, தென் சென்னையிலிருந்து மேகங்கள் மெதுவாக சென்னையை நோக்கி நகரும். சென்னையின் கடலோரப் பகுதிகளில் மழை தொடங்கி, நகரின் பெரும்பாலான பகுதிகளில் மழை பெய்யும்.

இன்று காலை சூரியன் உதிக்கத் தொடங்கும்போது இந்த மழை பலவீனமடையும். சென்னையில் லேசான தூரல் மழை தொடரும்.

இன்று சென்னைக்கு மழைக்கான ஒரு சிறந்த நாள் அல்ல. அக். 24, 25, 26 ஆகிய தேதிகள் சென்னைக்கு மிகவும் நல்ல நாள்கள்.

உள் தமிழ்நாடு - டெல்டா, தென் தமிழ்நாடு பகுதிகள், கடலூர்

விருதுநகர், திண்டுக்கல், தேனி, ஈரோடு, தென்காசி, திருப்பூர், அரியலூர், மயிலாடுதுறையின் டெல்டா பகுதிகள், திருவாரூர், கடலூர், நாகப்பட்டினம் ஆகிய அனைத்து இடங்களிலும் பரவலாக மழை பெய்யும்.