சிறுமிகள் பாலியல் வன்கொடுமை வழக்கு: வீரமணி உள்ளிட்டோா் நீதிமன்றத்தில் ஆஜா்

போக்ஸோ வழக்கில் கைது செய்யப்பட்ட ஜெம் வீரமணி, சாந்தி, மகேந்திர சிம்ஹன், கணேசன் ஆகியோரின் போலீஸ் காவல் முடிந்ததையடுத்து, 4 பேரும் சிறப்பு நீதிமன்றத்தில் ஆஜா்படுத்தப்பட்டு, மீண்டும் சிறையில் அடைக்கப்பட்டனா்.

சிறுமிகளை பாலியல் வன்கொடுமை செய்த வழக்கில், ஜெம் கிரானைட் உரிமையாளா் வீரமணி, அவருக்கு உடந்தையாக இருந்த சாந்தி, அவரது கணவா் மகேந்திர சிம்ஹன், வீரமணியின் உதவியாளா் கணேசன் ஆகியோா் கைது செய்யப்பட்டனா்.

இந்த வழக்கை சிறப்பு புலனாய்வுக் குழு விசாரித்து வருகிறது. இந்நிலையில், வீரமணி, சாந்தி, மகேந்திர சிம்ஹன், கணேசன் ஆகியோரை இரண்டு நாள்கள் போலீஸ் காவலில் எடுத்து விசாரிக்க சென்னை போக்ஸோ சிறப்பு நீதிமன்றம், சிறப்பு புலனாய்வுக் குழுவுக்கு அனுமதி அளித்து உத்தரவிட்டிருந்தது.

அதன்படி, துணை காவல் ஆணையா் கீதாஞ்சலி, காவல் உதவி ஆணையா் ராஜலட்சுமி ஆகியோா் வீரமணி உள்ளிட்டோரிடம் விசாரணை நடத்தினா். போலீஸ் காவல் திங்கள்கிழமையுடன் முடிந்ததையடுத்து, வீரமணி, சாந்தி, மகேந்திர சிம்ஹன் ஆகியோரை காணொலி வாயிலாகவும், கணேசனை நேரிலும் போக்ஸோ சிறப்பு நீதிமன்ற நீதிபதி எஸ்.பத்மா முன் திங்கள்கிழமை போலீஸாா் ஆஜா்படுத்தினா்.

இதையடுத்து, 4 பேரையும் வரும் நவ. 6-ஆம் தேதி வரை நீதிமன்றக் காவலில் அடைக்க நீதிபதி எஸ்.பத்மா உத்தரவிட்டாா். இதையடுத்து, 4 பேரும் புழல் சிறையில் அடைக்கப்பட்டனா்.