சேலத்தில் அமைச்சர் ஏற்றிய தேசியக்கொடி தலைகீழாக பறந்ததால் பரபரப்பு!

சேலத்தில் மாநில அளவிலான தடகளப் போட்டிகள் தொடக்க விழாவில் அமைச்சர் விஜய் தமிழன் ஏற்றிய தேசியக் கொடி சிறிது நேரம் தலைகீழாக பறந்தது.

சேலம் மகாத்மா காந்தி விளையாட்டு திடலில் மாநில அளவிலான 67 ஆவது குடியரசு நாள் தடகளப் போட்டிகள் இன்று தொடங்கின. இந்த போட்டிகளின் தொடக்க விழாவில் கலந்துகொண்ட போக்குவரத்து துறை அமைச்சர் விஜய் தமிழன் பார்த்திபன் தேசியக் கொடியேற்றி தொடக்கிவைத்தார்.

அவர் தேசியக் கொடியை ஏற்றியவுடன் கயிறு அறுந்து கொடி தலைகீழாக பறந்தது. இதனால் விழாவில் பரபரப்பு ஏற்பட்டது.

இதனை பார்த்த அமைச்சர் பார்த்திபன், உடனடியாக தேசியக் கொடியை கீழே இறக்கி, கயிற்றில் இறுக்கமாக கொடியைக் கட்டிய பிறகு மீண்டும் ஏற்றி வைத்தார்.

பின்னர், மாவட்ட வாரியாக வீரர், வீராங்கனைகளின் அணிவகுப்பு மரியாதையை அமைச்சர் பார்த்திபன் ஏற்றுக்கொண்டார்.