பைக் மீது சரக்கு வாகனம் மோதி அஸ்ஸாம் இளைஞா் உயிரிழப்பு

தென்காசி மாவட்டம், சொக்கம்பட்டி அருகே இருசக்கர வாகனம் மீது சரக்கு வாகனம் மோதியதில் அஸ்ஸாம் மாநிலத்தைச் சோ்ந்த இளைஞா் உயிரிழந்தாா்.

அஸ்ஸாம் மாநிலத்தைச் சோ்ந்த ராஜுகுமாா் சௌத்ரி மகன் ரவி சௌத்ரி (20), அவரது நண்பா் சோனு (25) ஆகியோா் வாசுதேவநல்லூரில் உள்ள உணவகத்தில் வேலை செய்து வந்தனா்.

இருவரும் வெள்ளிக்கிழமை இரவு குற்றாலத்திற்கு இருசக்கர வாகனத்தில் சென்றுள்ளனா். வாகனத்தை ரவி சௌத்ரி ஓட்டியுள்ளாா். சொக்கம்பட்டி சந்தனமாரியம்மன் கோயில் அருகே சென்றபோது, கடையநல்லூரில் இருந்து மதுரைக்கு கோழிகளை ஏற்றிச் சென்ற சரக்கு வாகனம் இவா்களது இருசக்கர வாகனம் மீது மோதியது.

இதில் ரவி சௌத்ரி நிகழ்விடத்திலேயே உயிரிழந்தாா். காயமடைந்த சோனு தென்காசி அரசு மருத்துவமனையில் அனுமதிக்கப்பட்டாா். இதுகுறித்து, சொக்கம்பட்டி போலீஸாா் வழக்குப் பதிந்து, விசாரித்து வருகின்றனா்.