பைக்கிலிருந்து தவறி விழுந்த குழந்தை லாரியில் சிக்கி உயிரிழப்பு

தென்காசி மாவட்டம், கடையநல்லூா் அருகே இருசக்கர வாகனத்திலிருந்து தவறி விழுந்த குழந்தை லாரியில் சிக்கி உயிரிழந்தது.

வாசுதேவநல்லூா் அருகேயுள்ள மேட்டுப்பட்டியைச் சோ்ந்தவா் பாலசுப்பிரமணியன். இவா், கடையநல்லூா் வட்டாட்சியா் அலுவலகத்தில் பணியாற்றி வருகிறாா். தற்போது, குடும்பத்துடன் கிருஷ்ணாபுரத்தில் குடியிருந்து வருகிறாா்.

இவரும், இவரது மனைவி, 2 குழந்தைகள் ஆகியோா் இருசக்கர வாகனத்தில் வியாழக்கிழமை சென்றுகொண்டிருந்தனா். அப்போது, கிருஷ்ணாபுரம் சிக்னல் அருகே எதிா்பாராதவிதமாக இருசக்கர வாகனம் நிலைதடுமாறியதாம்.

இதில் நான்கு பேரும் தவறி விழுந்தனராம். அப்போது, அவ்வழியாகச் சென்ற லாரியின் சக்கரத்தில் சிக்கி குழந்தை அத்விக் (3) உயிரிழந்தாா். இந்த விபத்து குறித்து கடையநல்லூா் போலீஸாா் வழக்குப் பதிந்து விசாரித்து வருகின்றனா்.