இரு சக்கர வாகனங்கள் நேருக்கு நோ் மோதி விபத்து: 3 போ் காயம்

திருத்தணி நகரில் அடுத்தடுத்து நடைபெற்ற இரண்டு இரு சக்கர வாகன விபத்துகளில் மூன்று போ் பலத்த காயமடைந்தனா்.

திருத்தணி அடுத்த கொண்டாபுரம் கிராமத்தைச் சோ்ந்த பூஷணம் (42) என்பவா், திங்கள்கிழமை தனது மகன் மது (27), மருமகள் சரண்யா (26) ஆகியோரை இரு சக்கர வாகனத்தில் ஏற்றிக்கொண்டு திருத்தணி நகருக்கு வந்துள்ளாா்.

பின்னா் பணிகளை முடித்துவிட்டு மூவரும் அதே வாகனத்தில் புதிய சென்னை சாலையில் சென்று கொண்டிருந்தனா். அப்போது எதிரே அதிவேகமாக வந்த மற்றொரு இரு சக்கர வாகனம், இவா்களது வாகனம் மீது நேருக்கு நோ் மோதியது. இந்த விபத்தில் மது மற்றும் அவரது மனைவி சரண்யா ஆகிய இருவரும் பலத்த காயமடைந்தனா்.

இதேபோல், மேல்திருத்தணியைச் சோ்ந்த வடிவேல் (43) என்பவா் திங்கள்கிழமை மாலை தனது இரு சக்கர வாகனத்தில் திருத்தணி பஜாருக்குச் சென்று கொண்டிருந்தாா். அப்போது பொதுப்பணித் துறை அலுவலகம் அருகே எதிரே வந்த மற்றொரு இரு சக்கர வாகனம் நேருக்கு நோ் மோதியதில் வடிவேல் பலத்த காயமடைந்தாா்.

இந்த இரு விபத்துகளிலும் காயமடைந்த மது, சரண்யா, வடிவேல் ஆகிய மூவரும் திருத்தணி அரசு மருத்துவமனையில் முதலுதவி சிகிச்சைக்காக அனுமதிக்கப்பட்டனா். பின்னா், மேல் சிகிச்சைக்காக தனியாா் மருத்துவமனைக்கு மாற்றப்பட்டனா். இது குறித்து திருத்தணி போலீஸாா் வழக்குப் பதிந்து விசாரணை நடத்தி வருகின்றனா்.