பாடம் சொல்லும் சேவல்!

கொக்கரக்கோ சேவல் ஒன்று
கூவி நின்னுச்சாம் --அது
செக்கச் சிவந்த கொண்டையோடு
சிலிர்ப்பைக் காட்டுச்சாம்

வீரநடைப் போட்டுகிட்டு
விழித்துப் பாத்துச்சாம்--அது
தீரமுடன் தரையைக்கிளறி
தீனித் தின்னுச்சாம்

நிறங்கள் பல கலந்திட்ட
நல்ல சட்டையை --அது
திறமையுடன் போட்டுக்கிட்டு
திரிந்து வந்துச்சாம்

குஞ்சுக்கோழி பறிக்கவந்த
கழுகு ஒன்றினை --அது
அஞ்சி விலகி பறந்திடவே
அடிச்சு விரட்டுச்சாம்

விடியல் வந்து விட்டதென
வாழ்த்து பாடுச்சாம்--அது
படிக்கும் காலைப் பொழுதென்று
பாடம் சொல்லுச்சாம்