பிரசவத்துக்கு சைக்கிளில் சென்ற நியூஸிலாந்து அமைச்சர்!

நியூஸிலாந்து நாட்டு பெண் அமைச்சர் ஒருவர், தனது முதல் குழந்தைப் பேற்றுக்காக மிதிவண்டியை ஓட்டியபடியே மருத்துவமனைக்குச் சென்ற செய்தி பரபரப்பை ஏற்படுத்தியுள்ளது.
ஜூலி அன்னி ஜென்டர் என்ற அவர், மகளிர் நலத் துறை அமைச்சராக பொறுப்பு வகித்து வருகிறார். நிறைமாத கர்ப்பிணியான அவரை பிரசவத்துக்காக ஞாயிற்றுக்கிழமை மருத்துவமனையில் சேருமாறு மருத்துவர்கள் அறிவுறுத்தியிருந்தனர்.
இந்த நிலையில், ஜூலியும், அவரது கணவரும் ஆளுக்கொரு மிதிவண்டியில் மருத்துவமனைக்குச் சென்றனர். 
இதுகுறித்து சமூக ஊடகங்களில் புகைப்படத்துடன் ஜூலி மேற்கொண்டுள்ள பதவில், காரில் போதிய இடம் இல்லாததால் நானும் எனது துணைவரும் மிதி வண்டிகளில் மருத்துவமனைக்குச் சென்றோம். இவ்வாறு செல்வது பிரசவத்தைப் பற்றிய கவலைகளைப் போக்கி, என்னை உற்சாகமாக வைத்திருக்க உதவியது என்று அவர் குறிப்பிட்டுள்ளார்.