400 வாக்குப்பதிவு மையங்கள் பதற்றமானவை

திருவள்ளூர், அக். 8: திருவள்ளூர் மாவட்டத்தில் உள்ள 2,286 வாக்குப்பதிவு மையங்களில் 400 பதற்றமானவை என கண்டறியப்பட்டுள்ளன.

 திருவள்ளூர் மாவட்டத்தில் 2 நகராட்சிகள், 8 பேரூராட்சிகள், 11 ஒன்றியங்கள் மற்றும் ஊராட்சிகளுக்கான உள்ளாட்சித் தேர்தல் வரும் 17, 19-ம் தேதிகளில் நடைபெற உள்ளன.

 இதற்கென மாவட்டம் முழுவதும் 2,286 வாக்குப்பதிவு மையங்கள் அமைக்கப்பட்டுள்ளன.

 தேர்தல் அமைதியான முறையில் நடைபெறவும், மக்கள் எவ்வித அச்சுறுத்தலும் இல்லாமல் வாக்களிக்கவும் தேவையான பாதுகாப்பு பணிகளில் போலீஸôர் ஈடுபட்டுள்ளனர்.

 இதற்கென மாவட்டம் முழுவதும் உள்ள பதற்றமான வாக்குச் சாவடிகள் குறித்த கணக்கெடுப்பு நடத்தப்பட்டுள்ளது.

 அதன்படி திருவள்ளூர், திருத்தணி நகராட்சிகள், ஆரணி, திருமழிசை, ஊத்துக்கோட்டை, பள்ளிப்பட்டு, பொதட்டூர்பேட்டை, கும்மிடிப்பூண்டி, மீஞ்சூர், பொன்னேரி உள்ளிட்ட 8 பேரூராட்சிகள், பள்ளிப்பட்டு, ஆர்.கே.பேட்டை, திருத்தணி, திருவாலங்காடு, கடம்பத்தூர், பூண்டி, திருவள்ளூர், எல்லாபுரம், கும்மிடிப்பூண்டி, மீஞ்சூர், சோழவரம் ஆகிய ஒன்றியப் பகுதியில் மொத்தம் 2,286 வாக்குப்பதிவு மையங்கள் அமைக்கப்பட்டுள்ளன.

 இவற்றில் மொத்தம் 400 மையங்கள் பதற்றமானவை என கண்டறியப்பட்டுள்ளது. மேலும் மிக பதற்றமான மையங்கள் குறித்து போலீஸôர் கணக்கெடுப்பு நடத்தி வருகின்றனர்.