அரசுப் பேருந்து மோதியதில் தனியார் நிறுவன ஊழியர் சாவு

சென்னை அடையாறில் அரசுப் பேருந்து மோதியதில் தனியார் நிறுவன ஊழியர் உயிரிழந்தார்.
 துரைப்பாக்கம் கண்ணகிநகரைச் சேர்ந்தவர் மாணிக்கம் (25). இவர் அடையாறில் உள்ள ஒரு கட்டுமான நிறுவனத்தில் ஊழியராக வேலை செய்து வந்தார். இவருக்கு திருமணமாகி ஒரு குழந்தை உள்ளது. மாணிக்கம் திங்கள்கிழமை காலை வேலைக்கு மோட்டார் சைக்கிளில் புறப்பட்டுச் சென்றார். அடையாறு எல்.பி. சாலையில் பாலம் அருகே சென்றபோது, பின்னால் திருவான்மியூரில் இருந்து அய்யப்பன்தாங்கல் நோக்கிச் வந்த மாநகரப் பேருந்து, மோட்டார் சைக்கிள் மீது மோதியது.
 இதனால், சாலையில் விழுந்த மாணிக்கம் மீது பேருந்து ஏறியது. இதில் அவர் சம்பவ இடத்திலேயே இறந்தார்.
 இது குறித்து அடையாறு போக்குவரத்துப் புலனாய்வு பிரிவு போலீஸார் வழக்குப் பதிவு செய்து, பேருந்து ஓட்டுநரான அசோக்நகரைச் சேர்ந்த ரமேஷை (47) கைது செய்தனர்.