தண்டவாளத்தில் ஏற்பட்ட விரிசல்: ரயில்கள் தாமதத்தால் பயணிகள் அவதி 

சிங்கப்பெருமாள் கோவிலுக்கும், மறைமலை நகருக்கும் இடையே திங்கள்கிழமை காலையில் ரயில் தண்டவாளத்தில் ஏற்பட்ட விரிசலை சரிசெய்யும் பணியில் பணியாளர் ஈடுபட்டனர். 
இதனால் ரயில்கள் காலதாமதமாக வந்ததையடுத்து பயணிகள் அவதிக்குள்ளாயினர். 
சிங்கப்பெருமாள்கோவில் - மறைமலைநகர் இடையில் ரயில்வே பணியாளர்கள் திங்கள்கிழமை காலையில் தண்டவாள பராமரிப்புப் பணியில் ஈடுபட்டிருந்தனர். 
அப்போது தண்டவாளத்தில் விரிசல் ஏற்பட்டிருந்ததைக் கண்டறிந்தனர். இது குறித்து செங்கல்பட்டு ரயில் நிலையத்திற்கு தகவல் கொடுத்தனர். இத்தகவலை அடுத்து அவ்வழியாக வந்த சென்னை புறநகர் ரயிலும், விரைவு ரயில்களும் கூடுவாஞ்சேரி, மறைமலைநகர், சிங்கப்பெருமாள்கோவில் என பல்வேறு இடங்களில் நடுவழியில் நிறுத்தப்பட்டன. 
ரயில்வே தண்டவாளப் பராமரிப்பு பணியாளர்கள் விரைந்துவந்து தண்டவாளத்தில் விரிசல் ஏற்பட்டிருந்த பகுதியை தற்காலிகமாக சரிசெய்தனர். ஆங்காங்கே நிறுத்தி வைக்கப்பட்டிருந்த விரைவு ரயில்களை இயக்கத் தொடங்கினர். 
முன்னதாக, விரிசலை சரிசெய்யும் பணி சுமார் 2 மணிநேரம் நடைபெற்றதால் காலதாமதமாக ரயில்கள் இயக்கப்பட்டன. இதனால் குறித்த நேரத்தில் உரிய இடங்களுக்கு செல்ல முடியாமல் பயணிகள் அவதிக்குள்ளாயினர்.