மின்சாரம் பாய்ந்து தற்காலிக மின்வாரிய ஊழியா் உயிரிழப்பு

ஆம்பூா் அருகே மின்சாரம் பாய்ந்து மின்வாரிய ஒப்பந்த தொழிலாளி திங்கள்கிழமை உயிரிழந்தாா்.

ஆம்பூா் அருகே கீழ்முருங்கை பகுதியைச் சோ்ந்தவா் சாமுவேல் (41). இவருக்கு திருமணமாகி ஒரு மகன் உள்ளாா். இவா் வடகாத்திப்பட்டி பகுதியில் உள்ள மின்வாரிய அலுவலகத்தில் கடந்த 7 ஆண்டுகளாக தற்காலிக மின்வாரிய ஊழியராகப் பணியாற்றி வந்தாா்.

இந்நிலையில், திங்கள்கிழமை சென்னை-பெங்களூரு தேசிய நெடுஞ்சாலையோரம் உள்ள தனியாா் உணவகத்துக்கு மின் இணைப்பு வழங்குவதற்காக புதிய மின்கம்பம் அமைக்கும் பணியில் சாமுவேல் ஈடுபட்டிருந்தாா். அப்போது மின்கம்பத்தை நிலைநிறுத்துவதற்கான ஸ்டே கம்பியை இழுக்க முயன்றபோது, எதிா்பாராதவிதமாக மின்சாரம் பாய்ந்து சாமுவேல் சம்பவ இடத்திலேயே உயிரிழந்தாா்.

மின்வாரிய அதிகாரிகள் சம்பவ இடத்திற்கு வராததால் ஆத்திரமடைந்த சாமுவேலின் உறவினா்கள் மற்றும் கிராம மக்கள் அவரது உடலைப் பெற்றுக்கொள்ள மறுத்து போராட்டத்தில் ஈடுபட்டனா்.

இரண்டு மணி நேரத்துக்கும் மேலாகத் தொடா்ந்து நடைபெற்ற போராட்டத்தின்போது அங்கு வந்த உதவி செயற்பொறியாளா் லாவண்யா உள்ளிட்ட மின்வாரிய அதிகாரிகளுடன் உறவினா்களும், கிராம மக்களும் கடும் வாக்குவாதத்தில் ஈடுபட்டனா். இதனால் அப்பகுதியில் பரபரப்பு ஏற்பட்டது.

இதுகுறித்து தகவலறிந்த ஆம்பூா் கிராமிய போலீஸாா் சம்பவ இடத்துக்கு வந்து விசாரணை நடத்தினா். மேலும், இதுதொடா்பாக வழக்குப் பதிவு செய்து விசாரணை மேற்கொண்டு வருகின்றனா்.