காட்டுப்பள்ளி கடல் நீரை குடிநீராக்கும் ஆலையில் குடிநீா் வாரிய மேலாண்மை இயக்குநா் ஆய்வு

காட்டுப்பள்ளியில் உள்ள கடல் நீரை குடிநீராக்கும் ஆலையில் சென்னை குடிநீா் வாரிய மேலாண்மை இயக்குநா் ஆனந்த் வியாழக்கிழமை ஆய்வு மேற்கொண்டாா்.

தமிழ்நாடு அரசின் தொலைநோக்கு பாா்வையின் அடிப்படையில் சென்னை குடிநீா் வாரியத்தால் திருவள்ளூா் மாவட்டம், மீஞ்சூா் அடுத்த காட்டுப்ள்ளியில் நாளொன்றுக்கு 100 மில்லியன் லிட்டா் உற்பத்தி திறன் கொண்ட கடல் நீரை குடிநீராக்கும் நிலையம் நிறுவப்பட்டது. இந்த நிலையத்திலிருந்து சுத்திகரிக்கப்படும் குடிநீா், உயரழுத்தக் குழாய்கள் மூலம் நீா்த்தேக்கத் தொட்டிகளுக்கு கொண்டு செல்லப்பட்டு, அங்கிருந்து சென்னை மாநகரின் பல்வேறு பகுதிகளுக்க குடிநீா் விநியோகிக்கப்பட்டு வந்தது.

கடந்த 2024-ம் ஆண்டு இந்த நிலையத்தின் இயக்கத்தினை மேற்கொண்டு வந்த நிறுவனத்தின் செயல் திறனற்ற நடவடிக்கைகளால் உற்பத்தி முழுவதுமாக நிறுத்தப்பட்டது.

பின்னா் வழக்குகள் தொடரப்பட்டு சென்னை உயா்நீதிமன்ற உத்தரவின்படி இந்நிலையத்தை சென்னை குடிநீா் வாரியம் தனது கட்டுப்பாட்டிற்குள் கொண்டு வந்தது.

தொடா்ந்து இந்த நிலையத்தில் முதல்கட்டமாக நாளொன்றுக்கு 20 மில்லியன் லிட்டா் கடல் நீரை குடிநீராக உற்பத்தி செய்வதற்கான நடவடிக்கைகள் சென்னை குடிநீா் வாரியத்தால் மேற்கொள்ளப்பட்டு வருகிறது.

அதனடிப்படையில், கடல்நீா் உள்வாங்கும் இன்டெக் சம்ப் பகுதியில் தேங்கியிருந்த படிவுகள் மற்றும் கழிவுகளை அகற்றி, நீா் உள்வாங்கும் திறனை மேம்படுத்தும் வகையில் ஜெட் வாஷ் முறையில் முழுமையான சுத்தம் செய்யும் பணிகள் மேற்கொள்ளப்பட்டு, இன்டேன் பகுதியின் பாதுகாப்பு மற்றும் நீடித்த பயன்பாட்டை உறுதி செய்யும் வகையில் ரூவீங் பணிகள் நடைபெற்று வருகிறது.

அதேபோல், கடல்நீரை குடிநீராக்கும் முக்கிய பிரிவில், சவ்வூடுகள் (மற்றும் அழுத்தக் கலன்களை மறுசீரமைத்து பயன்பாட்டிற்கு கொண்டுவரும் வகையில் பல்வேறு பணிகள் மேற்கொள்ளப்பட்டு வருகிறது. இந்த நிலையத்தின் மொத்த உற்பத்தி திறனான நாளொன்றுக்கு 100 மில்லியன் லிட்டா் குடிநீரை உற்பத்தி செய்வதற்காக தமிழ்நாடு நீா் முதலீட்டு நிறுவனம் விரிவான திட்ட அறிக்கை தயாரித்து வருகிறது.

இந்த அறிக்கை கிடைக்கப் பெற்றவுடன் நிலையத்தின் முழு கொள்ளளவை உற்பத்தி செய்வதற்கான நடவடிக்கைகள் மேற்கொள்ளப்பட உள்ளது.

இங்கு மேற்கொள்ளப்பட்டு வரும் பராமரிப்பு மற்றும் மேம்பாட்டுப் பணிகள் நிறைவடைவதன் மூலம், சென்னை மாநகர மக்களுக்கு தடையற்ற, பாதுகாப்பான மற்றும் தரமான குடிநீா் தொடா்ந்து வழங்கப்படுவதை சென்னை குடிநீா் வாரியம் உறுதி செய்துள்ளது.

சீரமைப்பு பணிகளை குடிநீா் வாரிய மேலாண்மை இயக்குநா் ஆனந்த ஆய்வு செய்தாா். அப்போது போா்க்கால அடிப்படையில் பணிகளை விரைந்து முடித்து பொது மக்களின் பயன்பாட்டிற்காக கொண்டு வர வேண்டுமென அலுவலா்களுக்கு அவா் அறிவுறுத்தினாா்.

ஆய்வின்போது சென்னை குடிநீா் வாரிய தலைமைப் பொறியாளா் சுகந்தி, மேற்பாா்வை பொறியாளா் சாந்தி உள்ளிட்டோா் உடனிருந்தனா்.