அதிமுகவினர் உள்பட 20 பேர் மீது வழக்குப் பதிவு

வியாபாரிகள் கொடி கட்டுவதைத் தடுத்துத் தகராறில் ஈடுபட்டதாக அதிமுகவினர் உள்பட 20 பேர் மீது உயர் நீதிமன்ற உத்தரவுப்படி வால்பாறை போலீஸார் புதன்கிழமை வழக்குப் பதிவு செய்துள்ளனர்.

 கடந்த ஆண்டு அக்டோபர் 21 இல் வால்பாறையில் சுற்றுலாவை மேம்படுத்த வலியுறுத்தி அரசின் கவனத்தை ஈர்க்கும் வகையில் கடைகளின் முன்பு கருப்புக் கொடியேற்றும் போராட்டத்தில் வியாபாரிகள் ஈடுபட்டனர்.

 அப்போது, வியாபாரிகள் கொடி கட்டுவதைத் தடுத்து, தகராறில் ஈடுபட்ட அதிமுகவினர் மீது நடவடிக்கை எடுக்கக் கோரி காவல் நிலையத்தில் வியாபாரிகள் கூட்டமைப்பின் தலைவர் சௌந்திரபாண்டியன் புகார் அளித்தார். ஆனால், போலீஸார் இது தொடர்பாக வழக்குப் பதிவு செய்யவில்லை.

 இந்நிலையில், சென்னை உயர் நீதிமன்ற உத்தரவின்பேரில் வால்பாறை போலீஸார்,சௌந்திரபாண்டியன் அளித்த புகார் தொடர்பாக அதிமுகவினர் தன்ராஜ், பொன்கணேஷ் மற்றும் அமீது உள்பட 20 பேர் மீது வழக்குப் பதிவு செய்துள்ளனர்.