மதுவில் ஊமத்தங்காய் அரைத்து கலந்து விற்பனை: 3 பேர் கைது

சூலூர் அருகே மதுவில் ஊமத்தங்காயை அரைத்துக் கலந்து விற்பனை செய்ததாக 3 பேரை சூலூர் காவல் துறையினர் சனிக்கிழமை கைது செய்தனர்.
சூலூர் சுற்று வட்டாரப் பகுதிகளில் விஷ மது விற்பனை நடைபெறுவதாக சூலூர் காவல் நிலையத்துக்கு ரகசியத் தகவல் கிடைத்தது. அதன்பேரில், சூலூர் காவல் உதவி ஆய்வாளர் லெனின் தலைமையில், காவல் துறையினர் தீவிரத் தேடுதல் வேட்டையில் ஈடுபட்டிருந்தனர். இந்நிலையில், சூலூர் பி.என்.பி.நகரில் சந்தேகத்துக்கு இடமான வகையில் நின்று கொண்டிருந்த நபரைப் பிடித்து விசாரித்தனர்.  அப்போது, அவர் சட்டவிரோதமாக விற்பனை செய்ய, 180 மில்லி லிட்டர் அளவு கொண்ட 15 மது பாட்டில்கள் வைத்திருந்தது தெரியவந்தது. 
விசாரணையில் அவர் காடம்பாடியைச் சேர்ந்த ராமசாமி மகன் தாமோதரன் (25) என்பது தெரியவந்தது. மாற்றுத் திறனாளியான இவர், சட்ட விரோதமாக மது விற்றதும், விரைவில் போதை ஏறுவதற்காக அதில் ஊமத்தம்காயை அரைத்து கலந்து விற்பனை செய்ததும் தெரியவந்தது.
இதேபோல, மதுவில் ஊமத்தம்காயை அரைத்து விற்பனை செய்ததாக செங்கத் துறையைச் சேர்ந்த கிட்டப்பன் மகன் பழனிசாமி (55), காங்கேயம்பாளையம் சடையப்பன் மகன் பெரியசாமி (45), காடம்பாடி சின்னசாமி மகன் மணி(57) ஆகிய 3 பேரையும் காவல் துறையினர் கைது செய்தனர்.  மேலும், அவர்களிடம் இருந்த 2 லிட்டர் மதுபானமும் பறிமுதல் செய்யப்பட்டது. 
இதையடுத்து, 4 பேரும் சூலூர் குற்றவியல் நீதிமன்ற நீதிபதி வேடியப்பன் முன்னிலையில் ஆஜர்படுத்தப்பட்டனர். இதையடுத்து, குற்றம் சாட்டப்பட்ட தாமோதரன் தவிர மீதமுள்ள 3 பேரையும் 10 நாள்கள் நீதிமன்றக் காவலில் வைக்க நீதிபதி வேடியப்பன் உத்தரவிட்டார். இதையடுத்து 3 பேரும் கோவை மத்தியச் சிறையில் அடைக்கப்பட்டனர். தாமோதரன் மாற்றுத் திறனாளி என்பதால் எச்சரிக்கப்பட்டு நிபந்தனை ஜாமீனில் விடுவிக்கப்பட்டார்.