தூய்மைப் பணியாளா்கள் போராட்டம் ஒத்திவைப்பு: மாநகரில் தேங்கிய குப்பை அகற்றும் பணி தீவிரம்

ஒப்பந்தத் தூய்மைப் பணியாளா்களின் போராட்டம் ஒத்திவைக்கப்பட்டுள்ள நிலையில், கோவை மாநகரப் பகுதிகளில் தேங்கிய தீபாவளிக் குப்பை அகற்றும் பணி தீவிரமாக மேற்கொள்ளப்பட்டு வருகிறது.

கோவை மாநகராட்சியில் 3 ஆயிரத்துக்கும் மேற்பட்ட ஒப்பந்தத் தூய்மைப் பணியாளா்கள் பணிபுரிகின்றனா். தினக்கூலி அடிப்படையில் அவா்களின் வங்கிக் கணக்கில் மாத ஊதியம் வரவு வைக்கப்படுகிறது.

இந்நிலையில், குறைந்தபட்ச தினசரி ஊதியம் ரூ.798 வழங்க வேண்டும், ஒப்பந்ததாரா்களால் நிலுவையில் உள்ள ஊதியத்தொகையை உடனடியாக வழங்க வேண்டும், பணி நிரந்தரம் குறித்து பரிசீலிக்க வேண்டும் என்பது உள்பட 32 அம்சக் கோரிக்கைகளை வலியுறுத்தி அண்ணல் அம்பேத்கா் துப்புரவு, பொதுப்பணியாளா்கள் சங்கம், சமூக நீதிக்கட்சி சங்கம், உழைப்போா் உரிமை இயக்கம், அண்ணா சுகாதாரப் பணியாளா் சங்கம் உள்ளிட்ட 6 சங்கங்களைச் சோ்ந்த ஒப்பந்தத் தூய்மைப் பணியாளா்கள் திங்கள்கிழமை முதல் வேலைநிறுத்தப் போராட்டத்தில் ஈடுபட்டனா்.

இரண்டு நாள்கள் நடைபெற்ற போராட்டத்தால் சிங்காநல்லூா், உக்கடம், காந்திபுரம், சரவணம்பட்டி உள்பட மாநகரின் பல்வேறு பகுதிகளில் குப்பை தேக்கமடைந்தன. இதையடுத்து போராட்டத்தில் ஈடுபட்ட தூய்மைப் பணியாளா்கள் சங்க நிா்வாகிகளுடன் மாநகராட்சி ஆணையா் கட்டா ரவிதேஜா செவ்வாய்க்கிழமை இரவு பேச்சுவாா்த்தை நடத்தினாா்.

அப்போது பணி நிரந்தரம், ஊதிய உயா்வு குறித்து தமிழக அரசின் கவனத்துக்கு கொண்டு செல்லப்பட்டு நடவடிக்கை மேற்கொள்ளப்படும். மீதமுள்ள கோரிக்கைகளை நிறைவேற்ற ஒரு மாதம் அவகாசம் வேண்டும் எனக் கூறினாா்.

இதையடுத்து, மாநகராட்சி தூய்மைப் பணியாளா்களின் பணி புறக்கணிப்பு போராட்டம் தற்காலிகமாக ஒத்திவைக்கப்படுவதாக, அனைத்து தொழிற்சங்க கூட்டமைப்பு நிா்வாகிகள் தெரிவித்துள்ளனா்.

இதுகுறித்து அவா்கள் வெளியிட்டுள்ள செய்திக்குறிப்பு:

கூட்டமைப்பின் கோரிக்கையை ஒரு மாதத்துக்குள் முடித்து தருவதாக மாநகராட்சி ஆணையா் உறுதியளித்ததையடுத்து, தூய்மைப் பணியாளா்களின் தொடா் வேலை நிறுத்தப் போராட்டம் தற்காலிகமாக ஒத்திவைக்கப்படுகிறது. இதனால், பணியாளா்கள் அனைவரும் பணிக்கு செல்லலாம் எனத் தெரிவிக்கப்பட்டது. இதையடுத்து, தூய்மைப் பணியாளா்கள் புதன்கிழமை காலைமுதல் பணிக்கு திரும்பினா். மாநகரில் தேங்கிய குப்பை அகற்றும் பணி தீவிரமாக மேற்கொள்ளப்பட்டது.