மூதாட்டியிடம் 4 பவுன் நகை பறிப்பு: கல்லூரி மாணவா், மாணவி கைது

போத்தனூா் அருகே மூதாட்டியிடம் முகமூடி அணிந்து தங்கச் சங்கிலியை பறித்துச் சென்ற சம்பவத்தில், கல்லூரி மாணவரும், அவரது தோழியும் செவ்வாய்க்கிழமை கைது செய்யப்பட்டனா்.

கோவை மாநகா், வெள்ளலூா் பகுதியில் வசிப்பவா் சரஸ்வதி. இவா் கடந்த 30-ஆம் தேதி மாலை 5.30 மணி அளவில் உறவினா்களுடன் வெள்ளலூா் கறிக்கடை பேருந்து நிறுத்தம் அருகே அமா்ந்து பேசிக் கொண்டிருந்தாா். அப்போது முகமூடி அணிந்து வந்த நபா், அருகில் உள்ள கிளினிக் எப்போது திறக்கப்படும் எனக் கேட்டுள்ளாா். பின்னா், மருத்துவரின் வீடு எங்குள்ளது என அந்த நபா் கேட்க, தெற்கு திசையில் உள்ள மைதான சாலையை சரஸ்வதி காட்டினாா். அப்போது, அந்த நபா் சரஸ்வதி அணிந்திருந்த சுமாா் 4 பவுன் தங்கச் சங்கிலியை பறித்துவிட்டு தப்பினாா்.

இதில் நிலை தடுமாறி கீழே விழுந்த சரஸ்வதி கூச்சலிடவே, அங்கிருந்தவா்கள் அவரைப் பிடிக்க முயன்றனா். ஆனால், அதற்குள் அந்த நபா் தப்பியோடிவிட்டாா்.

இதுகுறித்த புகாரின்பேரில் போத்தனூா் போலீஸாா் வழக்குப் பதிவு செய்தனா். இதில் குற்றவாளியைப் பிடிக்க போலீஸாா் தனிப் படை அமைத்ததுடன், சம்பவ இடத்தைச் சுற்றி இருந்த கண்காணிப்பு கேமராக்களை ஆய்வு செய்தனா். அப்போது, சற்று தொலைவில் இருசக்கர வாகனத்தில் தயாராக இருந்த பெண் ஒருவருடன் சோ்ந்து அந்த நபா் தப்பிய காட்சிகள் பதிவாகியிருந்தன. பின்னா், அவா்கள் சென்ற இருசக்கர வாகனத்தின் எண்ணை வைத்து போலீஸாா் விசாரணையை தீவிரப்படுத்தினா்.

இதில் திருநெல்வேலியைச் சோ்ந்த சிந்துவையும் (21), அவரிடம் நடத்தப்பட்ட விசாரணையின் அடிப்படையில் கல்லூரி விடுதியில் வைத்து பரணிதரனையும் (21) போலீஸாா் செவ்வாய்க்கிழமை கைது செய்தனா்.

இவா்கள் கோவை மாவட்டம், கக சாவடி பகுதியில் உள்ள தனியாா் கல்லூரி மாணவா்கள் என்பதும், நண்பா்களான இவா்கள் ஆடம்பரமாக வாழ்வதற்காகவும், பரணிதரனுக்கு இருந்த கடனை அடைப்பதற்காகவும் வயதான பெண்களை நோட்டமிட்டு நகைப்பறிப்பில் ஈடுபட்டதும் விசாரணையில் தெரியவந்தது.

இவா்களிடமிருந்து 4 பவுன் தங்கச் சங்கிலி, 2 கைப்பேசிகள் மற்றும் இருசக்கர வாகனம் ஆகியவை பறிமுதல் செய்யப்பட்டன.