பாரியூரில் பிரம்மோற்சவம் தொடக்கம்

ஈரோடு மாவட்டம், கோபி வட்டம் பாரியூர் கொண்டத்துக்காளியம்மன் கோயில் வகையறா ஆதி நாராயணப் பெருமாள் கோயிலில் பிரம்மோற்சவ விழா நடைபெறுகிறது.

 செப்டம்பர் 24-ஆம் தேதி (வியாழக்கிழமை) வாஸ்து சாந்தியுடன் விழா தொடங்கியது. வெள்ளிக்கிழமை காலை திருக்கொடியேற்றம், யாகசாலை கும்பஸ்தாபனம், நித்ய ஹோமம் ஆகியன நடைபெற்றன. 26-ஆம் தேதி காலை 6 மணிக்கு திருப்பள்ளியெழுச்சி, திருப்பல்லாண்டு நித்ய திருவாராதனம், பால தீர்த்தம், 7 மணிக்கு யாகசாலை நித்ய ஹோமம், 10.30 மணிக்கு மாலை மாற்றுதல், பகல் 12.30 மணிக்கு திருக்கல்யாண உற்சவம், தீபாராதனை, சாற்றுமறை, தீர்த்தம், பிரசாதம் வழங்குதல், 1 மணிக்கு அன்னதானம், மாலை 5 மணிக்கு யாகசாலை நித்ய ஹோமம், 6 மணிக்கு சுவாமி திருவீதி புறப்பாடு உள்ளிட்ட நிகழ்ச்சிகள் நடைபெறவுள்ளன. 27-ஆம் தேதி காலை 7.30 மணிக்கு பால் தீர்த்தம், பகல் 11 மணிக்கு சாற்றுமறை, மாலை 5.30 மணிக்கு பெருமாள் புஷ்ப பல்லக்கில் திருவீதி புறப்பாடு, 28-ஆம் தேதி காலை 9 மணிக்கு திருக்கொடியிறக்கம் ஆகியன நடைபெறவுள்ளன. விழாவிற்கான ஏற்பாடுகளை தக்கார், உதவி ஆணையர் ப.முருகையா, செயல் அலுவலர் ரா.மாலா ஆகியோர் செய்து வருகின்றனர்.