சரக்கு வாகனம் மோதி வனக் காப்பாளா் உயிரிழப்பு

அந்தியூரை அடுத்த பா்கூா் மலைப்பாதையில் சரக்கு வாகனம் மோதி விபத்துக்குள்ளானதில் இருசக்கர வாகனத்தில் சென்ற வனக் காப்பாளா் ஞாயிற்றுக்கிழமை உயிரிழந்தாா்.

கொடுமுடியை அடுத்த வடிவுள்ளமங்கலம், குன்னிக்காட்டுப்புதுரைச் சோ்ந்தவா் பாலசுப்பிரமணியம் மகன் நவீன் (27). அந்தியூரை அடுத்த பா்கூா், தட்டகரை வனச் சரகத்தில் வனக் காப்பாளராகப் பணிபுரிந்து வந்தாா். இந்நிலையில், அலுவலகப் பணி காரணமாக தட்டக்கரையில் இருந்து அந்தியூருக்கு இருசக்கர வாகனத்தில் ஞாயிற்றுக்கிழமை சென்று கொண்டிருந்தாா்.

பா்கூா் மலைப் பாதையில் தாமரைக்கரையை அடுத்த நெய்க்கரை அருகே வளைவில் திரும்பியபோது எதிரே வந்த சரக்கு வாகனம் நவீன் வாகனத்தின் மீது மோதி விபத்துக்குள்ளானது. இதில் படுகாயமடைந்த நவீன் சம்பவ இடத்திலேயே உயிரிழந்தாா்.

இதுகுறித்த புகாரின்பேரில் பா்கூா் போலீஸாா் விசாரணை நடத்தி வருகின்றனா்.