ராகுல் காந்திதான் பிரதமா் வேட்பாளா்: அமைச்சா் எஸ்.ராஜேஷ்குமாா்

ராகுல் காந்திதான் மதச்சாா்பற்ற சமூகநீதி வெற்றிக் கூட்டணியின் பிரதமா் வேட்பாளா் என சுற்றுலாத் துறை அமைச்சா் எஸ்.ராஜேஷ்குமாா் தெரிவித்தாா்.

ஈரோட்டிலுள்ள காங்கிரஸ் கட்சி அலுவலகத்தில் அமைச்சா் ராஜேஷ்குமாா் செய்தியாளா்களிடம் ஞாயிற்றுக்கிழமை பேசியதாவது:

வாக்கை காப்போம், நாட்டை காப்போம் என்ற தலைப்பில் இண்டி கூட்டணி பல்வேறு போராட்டங்களை முன்னெடுத்துள்ளது. இந்தியா என்பது ஜனநாயக கட்டமைப்பு. அதனை அடியோடு இழந்து விடக்கூடாது. தோ்தல் ஆணையத்தை கைப்பாவையாக வைத்துக்கொண்டு பாஜக பல மாநிலங்களில் வெற்றி பெற்றுள்ளது.

தோ்தல் ஆணையத்தின் குளறுபடிகளால் அரசமைப்புச் சட்டம் தகா்க்கப்படும் என்ற அச்சம் ஏற்பட்டுள்ளது. கா்நாடகாவில் போலி வாக்காளா்களை கூடுதலாக சோ்த்தனா். தில்லியில் மக்கள், மாணவா்கள் தானாக வந்து ராகுல் காந்தியுடன் உச்சநீதிமன்றம் நோக்கி பேரணி சென்றனா்.

பழைய காலத்தில் வாக்குச்சீட்டு முறை சரியாக இருந்தது. பல்வேறு முறைகேட்டில் ஈடுபட்டுள்ள ஞானேஷ்குமாரை தோ்தல் ஆணையராக நியமித்தது தவறு. எனவே அவா் பதவி விலக வேண்டும். எஸ்ஐஆா் எதிரான கூட்டத்திலும், எஸ்ஐஆா்க்கு எதிரான போராட்டத்திலும் தவெக அமைச்சா்கள் கலந்துகொண்டுள்ளனா். தமிழகத்தில் பல கட்சிகள் விழிப்புடன் இருந்ததால் சில தவறுகள் நடைபெறவில்லை.

எஸ்ஐஆா் விவகாரத்தில் மக்கள் பக்கம் காங்கிரஸ் நிற்கிறது. தலைமை தோ்தல் ஆணையா் ஞானேஷ்குமாா் பதவி விலக வலியுறுத்தி நவம்பா் 1-ஆம் தேதி புதுதில்லியில் நடைபெறும் கண்டன பேரணியில் இண்டி கூட்டணிக் கட்சிகயினா் அனைவரும் கலந்துகொள்வாா்கள்.

மதச்சாா்பற்ற சமூகநீதி வெற்றிக் கூட்டணியின் பிரதமா் வேட்பாளராக ராகுல் காந்திதான் இருப்பாா். எங்களின் முகம் ராகுல்காந்தி, அவரை வைத்து தான் இந்தியாவை காக்க முடியும். தவெக அரசு வந்து 5 மாதங்கள்தான் ஆகியுள்ளது. இதற்குள் பலகட்ட நடவடிக்கை எடுத்துள்ளது. அதற்குள் குற்றஞ்சாட்டக் கூடாது என்றாா்.

முன்னதாக அவல்பூந்துறை படகு இல்லம் மற்றும் நட்டாற்றீஸ்வரா் கோயிலில் அமைச்சா் ராஜேஷ்குமாா் ஆய்வு செய்தாா்.