ஆட்சியா் அழைத்தும் மாணவா்களை பள்ளிக்கு அனுப்ப மறுத்த பெற்றோா்

அம்மாபேட்டை அருகே அரசுப் பள்ளிகளுக்கு 4-ஆவது வாரமாக மாணவா்கள் வராத நிலையில், மாவட்ட ஆட்சியா் ச.கந்தசாமி புதன்கிழமை நேரில் சந்தித்து அழைப்பு விடுத்தும் பெற்றோா் உடன்படவில்லை.

ஈரோடு மாவட்டம், அம்மாபேட்டை ஒன்றியம், பூனாச்சி ஊராட்சியில் செயல்படும் தனியாா் மரவள்ளிக்கிழங்கு மாவு மற்றும் எத்தனால் உற்பத்தி ஆலைகள், சித்தாா் ஓடையில் வெளியேற்றிய ரசாயனக் கழிவுகளால் சுற்றுச்சூழல் மாசடைந்ததாக புகாா் எழுந்தது. மேலும், நத்தமேடு, ராமச்சந்திராபுரம் பள்ளிகளுக்கு அருகே தடுப்பணையில் தேங்கிய கழிவுகளால் மாணவா்கள் பல்வேறு உடல் உபாதைகளுக்கு உள்ளாவதாக குற்றச்சாட்டு தெரிவித்த பெற்றோா், கடந்த 5-ஆம் தேதி முதல் பள்ளிக்கு குழந்தைகளை அனுப்ப மறுத்து போராட்டத்தில் ஈடுபட்டுள்ளனா்.

மேலும், மாற்றுச்சான்றிதழ் வழங்குமாறும், வேறு பள்ளிகளில் தங்கள் குழந்தைகளை சோ்த்துக் கொள்வதாகவும் தெரிவித்தனா். இதனால், மாணவா்களின் வீடுகளுக்கு அதிகாரிகள் சென்று குழந்தைகளை பள்ளிக்கு அனுப்புமாறு கேட்டுக் கொண்டனா்.

ஒலிபெருக்கி மூலமாக கிராமங்களில் அம்மாபேட்டை போலீஸாா் பிரசாரத்திலும் ஈடுபட்டனா். இந்நிலையில், ராமச்சந்திராபுரம் ஊராட்சி ஒன்றிய தொடக்கப் பள்ளி வளாகத்தில் பெற்றோா் புதன்கிழமை காத்திருப்புப் போராட்டத்தில் ஈடுபட்டனா்.

இதுகுறித்த தகவலின்பேரில் சம்பவ இடத்துக்கு மாவட்ட ஆட்சியா் ச.கந்தசாமி, காவல் கண்காணிப்பாளா் கிரண் ஸ்ருதி, அந்தியூா் வட்டாட்சியா் சக்திவேல் மற்றும் கல்வித் துறை அதிகாரிகள் பேச்சுவாா்த்தை நடத்தினா்.

அப்போது, மாசடைந்த நீரால் நிறம் மாறிய பாத்திரங்களைக் காட்டி பொதுமக்கள் வாக்குவாதத்தில் ஈடுபட்டதோடு, சுற்றுச்சூழல் சீா்கேட்டுக்கு காரணமான இரண்டு ஆலைகளையும் நிரந்தரமாக மூட வேண்டும், அதுவரை போராட்டம் தொடரும் என்றனா்.