பெருந்துறைக்கு நவ. 3-இல் முதல்வர் விஜய் வருகை!

ஈரோடு மாவட்டம், பெருந்துறைக்கு நவம்பா் 3-ஆம் தேதி வரும் தமிழக முதல்வா் ச.ஜோசப் விஜய், 9 ஆயிரம் மகளிா் சுயஉதவிக் குழுக்களுக்கு ரூ.1,110 கோடி மதிப்பில் வங்கிக் கடனுதவி வழங்குகிறாா்.

பெருந்துறை தனியாா் பொறியியல் கல்லூரி வளாகத்தில் நடைபெறும் இவ்விழாவில் முதல்வா் ச.ஜோசப் விஜய் கலந்து கொண்டு, 13 மாவட்டங்களைச் சோ்ந்த சுமாா் 9 ஆயிரம் மகளிா் சுயஉதவிக் குழுக்களுக்கு, ரூ.1,110 கோடி மதிப்பிலான வங்கி கடனுதவிகளை வழங்குகிறாா்.

அரசின் சாா்பில் மாநிலத்திலேயே முதல்முறையாக, மகளிா் பொருளாதார மேம்பாட்டை ஊக்குவிக்கும் நோக்கில், வங்கிக் கடனுதவி வழங்கும் விழா பெருந்துறையில் முதல்கட்டமாக தொடங்கப்பட உள்ளது குறிப்பிடத்தக்கது.

பள்ளிக் கல்வித் துறை சாா்பில் நபாா்டு வங்கி மூலம் 12 பள்ளிகளில் ரூ.15 கோடியே 97 லட்சம் செலவில் கட்டப்பட்டுள்ள 70 புதிய வகுப்பறைகளை திறந்துவைக்கிறாா். இதேபோல பல்வேறு துறை சாா்ந்த முடிவுற்ற பணிகளையும் திறந்துவைத்தும், புதிய வளா்ச்சித் திட்டப் பணிகளுக்கு அடிக்கல் நாட்டியும் வைக்கிறாா்.

நிகழ்ச்சியில் பங்கேற்பதற்காக முதல்வா் விஜய் சென்னையில் இருந்து தனி விமானம் மூலம் கோவை விமான நிலையத்துக்கு 3-ஆம் தேதி வருகிறாா். அங்கிருந்து ஹெலிகாப்டா் மூலம் பெருந்துறை தனியாா் பொறியியல் கல்லூரி வளாகத்துக்கு வருகிறாா்.

அதே நேரம் சாலை வலம் (ரோடு ஷோ) மூலம் பொதுமக்களை சந்திக்கவும் திட்டமிடப்பட்டுள்ளது. 10 கிலோ மீட்டா் தொலைவுக்கு சாலையோரங்களில் பாதுகாப்பு ஏற்படுத்தும் வகையில் இரும்புத் தடுப்பு வேலிகள் அமைக்கப்பட்டு வருகின்றன.

இந்நிலையில் நிகழ்ச்சிக்கான ஏற்பாடுகளை அமைச்சா்கள் கே.ஏ. செங்கோட்டையன், ம. விஜய் பாலாஜி ஆகியோா் செய்து வருகின்றனா். இதையொட்டி, தவெக பொதுச்செயலாளரும், அமைச்சருமான என்.ஆனந்த் தலைமையில் வெள்ளிக்கிழமை இரவு ஆலோசனைக் கூட்டம் நடைபெற்றது. இதில் அமைச்சா்கள் கே.ஏ.செங்கோட்டையன், ம. விஜய் பாலாஜி, ஆட்சியா் ச.கந்தசாமி, மாவட்ட காவல் கண்காணிப்பாளா் கிரண் ஸ்ருதி, சட்டப்பேரவை உறுப்பினா்கள் வி.சத்தியபாமா (திருப்பூா் வடக்கு), கே.கே.ஆனந்த் மோகன் (ஈரோடு மேற்கு), து.சண்முகன் (மொடக்குறிச்சி), வி.பி.தமிழ்ச்செல்வி (பவானிசாகா்), பெருந்துறை முன்னாள் சட்டப்பேரவை உறுப்பினா் எஸ்.ஜெயக்குமாா் உள்பட பலா் கலந்து கொண்டனா்.