உதகையில் மருத்துவ கண்காட்சி நிறைவு

இந்திய மருத்துவ சங்கத்தின் நீலகிரி மாவட்ட கிளை, கோவை கே.எம்.சி.ஹெச். மருத்துவமனை ஆகியவை உதகை ராகம் தொலைக்காட்சியுடன் இணைந்து உதகையில் நடத்திய 2 நாள்கள் மருத்துவக் கண்காட்சி ஞாயிற்றுக்கிழமை நிறைவடைந்தது.
மருத்துவக் கண்காட்சியில் கே.எம்.சி.ஹெச். மருத்துவமனை, கோவை டெய்ஸி மருத்துவமனை, வம்சம் செயற்கை கருவூட்டல் மையம்,  அபிராமி மருத்துவமனை,  சாய்கிராம் ஆயுர்வேத மருத்துவமனை உள்பட 20க்கும் மேற்பட்ட மருத்துவமனைகளின் அரங்குகள் அமைக்கப்பட்டிருந்தன.
இதில், உதகை அரசு தலைமை மருத்துவமனையின் சார்பில் காசநோய் கண்டறிவதற்கான சிறப்புப் பிரிவும் இடம் பெற்றிருந்தது. தினமணி நாளிதழ் சார்பில் சிறப்பு அரங்கு அமைக்கப்பட்டிருந்தது.
கண்காட்சியை நீலகிரி மாவட்ட ஆட்சியர் இன்னசென்ட் திவ்யா சனிக்கிழமை தொடங்கி வைத்த நிலையில் சுமார் 1,500 பேர் பங்கேற்றிந்தனர். ஞாயிற்றுக்கிழமை நடைபெற்ற இரண்டாவது நாள் கண்காட்சியில் சுமார் 3,000 பேர் பங்கேற்றனர்.
அகில் பிட்னெஸ் சென்டர், ராஜ் ஹியரிங் சென்டர் ஆகியவற்றின் சார்பில் இலவச உபகரணங்களும் வழங்கப்பட்டன. கண்காட்சியின் நிறைவில் தினமணி நாளிதழ்
அரங்கு உள்பட அனைத்து அரங்குகளுக்கும் உதகை நகர்மன்ற ஆணையர் ரவி நினைவுப் பரிசு வழங்கினார்.