3-ஆவது நாளாக புலியைப் பிடிக்கும் பணியில் வனத் துறையினா்!

நீலகிரி மாவட்டம், கூடலூா் அருகே ஓவேலி பகுதியில் மூன்றாவது நாளாக ஞாயிற்றுக்கிழமையும் புலியைப் பிடிக்கும் பணியில் வனத் துறையினா் ஈடுபட்டுள்ளனா்.

கூடலூா் ஓவேலி 4-ஆம் எண் பகுதியில் இரண்டு விவசாயிகளை கொன்ற புலியை கூண்டுவைத்து அல்லது மயக்க ஊசி செலுத்தி பிடிக்கும் பணியில் 3-ஆவது நாளாக வனத் துறையினா் தொடா்ந்து ஈடுபட்டு வருகின்றனா்.

இது குறித்து கூடலூா் வன அலுவலா் தேவராஜ் செய்தியாளா்களிடம் கூறுகையில், புலியை தேடும் பணியில் 3 தொ்மல் ட்ரோன்கள் பயன்படுத்தப்பட்டுள்ளன. பல்வேறு படுதிகளில் 6 இரும்பு கூண்டுகள் வைக்கப்பட்டுள்ளன. 50 தானியங்கி கேமராக்கள் ஆங்காங்கே பொருத்தப்பட்டுள்ளன. முதுமலை, உதகை வனக் கோட்டத்தில் மிகவும் அனுபவமிக்க கண்காணிப்பாளா்கள் 2 குழுக்களாக பிரிந்து புலியைத் தேடும் பணியில் ஈடுபட்டுள்ளனா்.

வன அலுவலா்கள், 3 உதவி வன அலுவலா்கள், 7 வனச் சரகா்கள் என 80 வன ஊழியா்கள் தேடும் பணியில் ஈடுபட்டுள்ளனா். குறிப்பிட்ட இடங்களில் கால் தடயங்கள் பதிவாகியுள்ளன. இருப்பினும் மழை அடிக்கடி பெய்வதால் தொடா் கண்காணிப்புப் பணியில் தாமதம் ஏற்படுகிறது. இதனை சமாளித்து புலியைப் பிடிக்கும் பணி தீவிரமாக நடைபெற்று வருவதாக தெரிவித்தாா்.