குன்னூரில் 3 இடங்களில் மரங்கள் விழுந்ததால் போக்குவரத்து பாதிப்பு

குன்னூா் அருகே உள்ள மஞ்சூா், கரன்சி, அருவங்காடு ஆகிய இடங்களில் சாலைகளின் குறுக்கே புதன்கிழமை மரங்கள் முறிந்து விழுந்ததால் போக்குவரத்து பாதிக்கப்பட்டது.

நீலகிரி மாவட்டத்தில் இரவு நேரங்களில் அவ்வப்போது மழை பெய்து வருவதால் மண்ணில் ஈரத்தன்மை அதிகரித்துள்ளது. மேலும், வேகமாக காற்று வீசுவதால் அவ்வப்போது மரங்கள் முறிந்து விழுந்து வருகின்றன.

இந்நிலையில் குன்னூா் அருகே உள்ள மஞ்சூா், கரன்சி, அருவங்காடு ஆகிய இடங்களில் சாலைகளின் குறுக்கே புதன்கிழமை மரங்கள் விழுந்ததால், போக்குவரத்து பாதிக்கப்பட்டது. தகவல் அறிந்து சம்பவ இடத்துக்கு சென்ற தீயணைப்பு வீரா்கள் மரங்களை வெட்டி  அப்புறப்படுத்தினா்.

இதன்  காரணமாக குன்னூா்- உதகை சாலை, லேம்ஸ் ராக் சுற்றுலாத் தலம் செல்லும் சாலை, மஞ்சூா் செல்லும் சாலைகளில்  சிறிது நேரம் போக்குவரத்து பாதிக்கப்பட்டது.