பொங்கலூா் காவல் நிலையத்தில் வழக்குப் பதிவு தொடக்கம்

பல்லடம் அருகே பொங்கலூா் காவல் நிலையத்தில் செவ்வாய்க்கிழமைமுதல் வழக்குப் பதிவு செய்வது தொடங்கப்பட்டுள்ளது.

பல்லடம் அருகே உள்ள பொங்கலூரில் முந்தைய திமுக ஆட்சியில் அமைக்கப்பட்ட புதிய காவல் நிலையத்தை அப்போதைய முதல்வா் மு.க.ஸ்டாலின் 2025 டிசம்பா் 22-ஆம் தேதி காணொலி மூலம் தொடங்கிவைத்தாா்.

இதில் பொங்கலூா் காவல் நிலையத்தில் காமநாயக்கன்பாளையம் காவல் நிலையத்துக்கு உள்பட்ட கள்ளிப்பாளையம், வடமலைபாளையம், காட்டூா், அவிநாசிபாளையம் காவல் நிலையத்துக்கு உள்பட்ட பொங்கலூா், உகாயனூா், பல்லடம் காவல் நிலையத்துக்கு உள்பட்ட மாதப்பூா் என ஆறு ஊராட்சிகள் பொங்கலூா் காவல் நிலையத்துக்கு உள்பட்ட பகுதிகளாக வரையறுக்கப்பட்டு செயல்பட்டு வருகிறது.

பொங்கலூா் காவல் நிலையத்தில் முதல் உதவி ஆய்வாளராக சந்திரன் பணியாற்றினாா். இவா் இடமாறுதல் செய்யப்பட்டதைத் தொடா்ந்து, பொங்கலூா் காவல் நிலைய இரண்டாவது உதவி ஆய்வாளராக ராஜா பணியாற்றி வருகிறாா். மேலும் ஒரு பெண் போலீஸ் உள்பட 10 போ் பணியாற்றி வருகின்றனா்.

பொங்கலூா் காவல் நிலையத்தில் முதல் தகவல் அறிக்கை பதிவு செய்ய முடியாத நிா்வாக சூழல் இருந்து வந்தது. அதனால் முன்பு இருந்த காவல் நிலைய பகுதியிலேயே அந்தந்த பகுதிகளுக்கு வழக்குப் பதிவு செய்யப்பட்டு விசாரணை நடைபெற்று வந்தது.

இந்நிலையில் பொங்கலூா் காவல் நிலையத்திலேயே வழக்குப் பதிவு செய்ய திருப்பூா் மாவட்ட நிா்வாகம் உரிய நடவடிக்கை எடுக்க வேண்டும் என்று பொதுமக்கள் வலியுறுத்தி வந்தனா். இந்நிலையில் பொங்கலூா் காவல் நிலையத்தில் செவ்வாய்க்கிழமைமுதல் வழக்குப் பதிவு ( எப்ஐஆா்) செய்யும் பணி தொடங்கியுள்ளது. பொங்கலூா் காவல் நிலையத்தை 0421- 2230100 என்ற தொலைபேசி எண்ணில் தொடா்பு கொள்ளலாம்.