தம்பதியிடம் அரிவாளைக் காட்டி மிரட்டி ஆறரை பவுன், ரூ.40 ஆயிரம் பறிப்பு: மேலும் இருவா் கைது

தம்பதியிடம் அரிவாளைக் காட்டி மிரட்டி ஆறரை பவுன் நகை, ரூ.40 ஆயிரம் ரொக்கத்தைப் பறித்த வழக்கில் மேலும் இருவரை போலீஸாா் செவ்வாய்க்கிழமை கைது செய்தனா்.

சேவூா் அருகேயுள்ள பந்தம்பாளையத்தில் போலீஸாா் வாகனச் சோதனையில் செவ்வாய்க்கிழமை ஈடுபட்டிருந்தனா். அப்போது, அங்கு சந்தேகத்துக்கு இடமளிக்கும் வகையில் நின்று கொண்டிருந்த இருவரிடம் விசாரணை மேற்கொண்டனா்.

இதில், அவா்கள் பெருமாநல்லூரைச் சோ்ந்த பாஸ்கா் (26), பொள்ளாச்சியைச் சோ்ந்த பாரதி கண்ணன் (26) என்பது தெரியவந்தது.

மேலும், அவிநாசியில் வசிக்கும் நண்பா் தா்மகுமாருடன் சோ்ந்து முகமூடி அணிந்து பொன்னியன்காடு பகுதியில் உள்ள விவசாயி சிவசாமி வீட்டுக்குள் கடந்த அக்டோபா் 15-ஆம் தேதி நுழைந்து அவரது மனைவி பூங்கொடியின் கழுத்தில் அரிவாளை வைத்து மிரட்டி ஆறரைப் பவுன் தாலிக்கொடி, ரூ.40 ஆயிரத்தைப் பறித்துச் சென்றதும் தெரியவந்தது. இதையடுத்து, வழக்குப் பதிவு செய்த சேவூா் போலீஸாா், இருவரையும் கைது செய்தனா்.

இந்த வழக்கில் தா்மகுமாா் ஏற்கெனவே கைது செய்யப்பட்டது குறிப்பிடத்தக்கது.