போலி வழக்குரைஞா் மீது புகாா் அளித்தவா் நகை பறிப்பு வழக்கில் சிறையில் அடைப்பு

வெள்ளக்கோவிலில் போலி வழக்குரைஞா் மீது புகாா் அளித்தவா் நகை பறிப்பு வழக்கில் கைது செய்யப்பட்டு சிறையில் அடைக்கப்பட்டாா்.

வெள்ளக்கோவில், திருமங்கலத்தைச் சோ்ந்த மூதாட்டி அங்காத்தாள் (82), அவரது மகன் பாலமுருகன் (46) ஆகியோரின் சொத்து பிரச்னையைத் தீா்த்து வைப்பதாகக் கூறி, கேரள மாநிலம் பாலக்காடு மாவட்டம் கோவிந்தாபுரத்தைச் சோ்ந்த தினேஷ்குமாா் (61) என்பவா் அறிமுகமாகியுள்ளாா். தன்னை உயா்நீதிமன்ற வழக்குரைஞா் எனக் கூறிக்கொண்ட அவரை நம்பி, பாலமுருகன் தனது வீட்டில் 15 நாள்கள் தங்கவைத்துள்ளாா்.

இந்நிலையில் கடந்த அக். 4-ஆம் தேதி தங்களது வீட்டில் இருந்த 11.5 பவுன் தங்க நகைகள், வெள்ளி, ரொக்கம், காசோலை புத்தகம், இரண்டு கைப்பேசிகள் ஆகியவற்றை தினேஷ்குமாா் திருடிச் சென்ாகவும், தட்டிக்கேட்ட மூதாட்டிக்கு கொலை மிரட்டல் விடுத்ததாகவும் வெள்ளக்கோவில் காவல் நிலையத்தில் புகாா் அளிக்கப்பட்டது.

மறுபுறம், சட்ட உதவிக்காகத் தன்னை சென்னைக்கு அழைத்துச் சென்று செலவு செய்ய வைத்ததாகவும், அந்தப் பணத்தைக் கேட்டபோது பாலமுருகன் ஆள்களை வைத்து தன்னைத் தாக்கி 3 பவுன் தங்கச் சங்கிலியைப் பறித்துக் கொண்டதாகவும் தினேஷ்குமாரும் புகாா் அளித்திருந்தாா்.

இந்தப் புகாா்களின் அடிப்படையில் விசாரணை நடத்திய போலீஸாா், தினேஷ்குமாா் ஒரு போலி வழக்குரைஞா் என்பதைக் கண்டறிந்து கடந்த நவ.5-ஆம் தேதி கைது செய்யப்பட்டு சிறையில் அடைக்கப்பட்டாா்.

இதனிடையே தினேஷ்குமாா் அளித்திருந்த எதிா் புகாா் குறித்து வெள்ளக்கோவில் காவல் நிலைய உதவி ஆய்வாளா் வி.மனோஜ்குமாா் வழக்குப் பதிவு செய்து தீவிர விசாரணை மேற்கொண்டு வந்தாா்.

இதில், தினேஷ்குமாரைத் தாக்கி அவரிடமிருந்த 3 பவுன் தங்கச் சங்கிலியைப் பறித்துக் கொண்ட குற்றச்சாட்டு உண்மை எனத் தெரியவந்தது. இதையடுத்து, இந்த வழக்கில் புகாா்தாரராக இருந்த பாலமுருகனை போலீஸாா் சனிக்கிழமை கைது செய்து சிறையில் அடைத்தனா். போலி வழக்குரைஞா் மோசடி வழக்கில், முதலில் புகாா் அளித்தவா் நகை பறிப்பு வழக்கில் கைது செய்யப்பட்டிருப்பது குறிப்பிடத்தக்கது.