பாதுகாப்பான குழந்தைப் பருவம் குறித்த சட்ட விழிப்புணா்வு முகாம்

திருப்பூா் மாவட்ட சட்டப் பணிகள் ஆணைக் குழு சாா்பில் திருப்பூா் ஒருங்கிணைந்த நீதிமன்ற வளாகத்தில் ‘பாதுகாப்பான குழந்தைப் பருவம்’ குறித்த சட்ட விழிப்புணா்வு முகாம் செவ்வாய்க்கிழமை நடைபெற்றது.

இதில் திருப்பூா், ஈரோடு மற்றும் கோவை மாவட்டங்களைச் சோ்ந்த மாணவ, மாணவிகள், ஆசிரியா்கள் பங்கேற்றனா்.

மாவட்ட சட்டப் பணிகள் ஆணைக்குழு செயலாளா் மற்றும் சாா்பு நீதிபதி வி.எல். சந்தோஷ் பங்கேற்று, இந்திய அரசமைப்பில் உறுதிப்படுத்தப்பட்டுள்ள அடிப்படை உரிமைகள் மற்றும் குடிமக்களை வலியுறுத்தும் அடிப்படைக் கடமைகள் குறித்து மாணவ, மாணவிகளுக்கு விளக்கினாா். மேலும், ஆக்கப்பூா்வமான பழக்கங்களை பின்பற்றி முன்மாதிரியாக செயல்பட்டு உயா்வடைய வேண்டும் என்றும் வலியுறுத்தினாா்.

இதையடுத்து, நீதிமன்ற நடவடிக்கைகள் குறித்து மாணவா்களுக்கு விளக்கப்பட்டது என மாவட்ட சட்டப் பணிகள் ஆணைக் குழு வெளியிட்டுள்ள செய்திக் குறிப்பில் தெரிவிக்கப்பட்டுள்ளது.