சொட்டு நீர்ப் பாசன குழாய்கள் திருட்டு வழக்கில் மேலும் 2 பேர் கைது

அரூர் அருகே சொட்டு நீர்ப் பாசன குழாய்களை திருடியதாக மேலும் 2 பேரை போலீஸார் ஞாயிற்றுக்கிழமை கைது செய்தனர்.

அரூர் வட்டம், முத்து நகரைச் சேர்ந்த விவசாயி மணி (68). இவரது நிலத்தில் இருந்த சொட்டு நீர்ப் பாசன குழாய்களை மர்ம நபர்கள் அண்மையில் திருடிச் சென்றனர். இதேபோல, ஈட்டியம்பட்டி கிராமத்தைச் சேர்ந்த சின்னப்பையன் (42), கூச்சனூரைச் சேர்ந்த குமரன் (47) ஆகியோரது நிலத்தில் இருந்த சொட்டு நீர்ப் பாசன குழாய்களும் அடுத்தடுத்து திருடு போனது. இவைகளின் மதிப்பு ரூ.2.90 லட்சம்.

இதுகுறித்து வழக்குப் பதிவு செய்த அரூர் போலீஸார், அரூர் வட்டம், கௌôப்பாறை கிராமத்தைச் சேர்ந்த சென்னப்பன் (35), முருகன் (45) ஆகிய 2 பேரையும் ஞாயிற்றுக்கிழமை கைது செய்தனர்.

இந்த வழக்கில் ஏற்கெனவே அரூரைச் சேர்ந்த ஜெயசேகர ராஜ் (45), கீரைப்பட்டி கிராமத்தைச் சேர்ந்த முருகேசன் (50) ஆகிய இருவரையும் போலீஸார் கைது செய்துள்ளனர். இதுகுறித்து போலீஸார் தொடர்ந்து விசாரணை நடத்தி வருகின்றனர்.